Oliy Majlis Nızamshılıq palatasınıń májilisinde «Banklerdi sanaciyalaw hám saplastırıw haqqında»ǵı nızam joybarı ekinshi oqıwda statyama-statya kórip shıǵıldı.

– Házirgi kúnde bank sistemasın bazar mexanizmleri tiykarında jetilistiriw baǵdarındaǵı jumıslar menen birge, áhmiyetke iye banklerde payda bolatuǵın qarjı turaqsızlıǵı jaǵdaylarınıń bank sistemasına unamsız tásiriniń aldın alıw arqalı mámlekette qarjılay turaqlılıqtı támiyinlewdiń huqıqıy tiykarların jaratıw zárúrligi de artıp barmaqta,-dedi deputat M.Qurbonboev. – Sonıń ushın bul nızam joybarı menen banklerdi sanaciyalaw hám saplastırıwǵa baylanıslı qatnasıqlardı tártipke salıw, banklerdiń ekonomika ushın áhmiyetli bolǵan wazıypaları hám xızmetleriniń úzliksizligin támiyinlew, amanatshılar hám kreditorlardıń máplerin qorǵaw hám bul arqalı qarjı hám bank sistemasınıń turaqlılıǵın támiyinlewde sanaciya qurallarınan nátiyjeli paydalanıwǵa baylanıslı huqıqıy tiykarlar engizilmekte.
Bunnan tısqarı, joybarda Oraylıq bank banklerdi sanaciyalaw boyınsha wákillikli mámleketlik uyım sıpatında belgilenbekte, oǵan sanaciyalaw boyınsha wákillikler beriliwi názerde tutılmaqta.
Sonday-aq, banklerdi sanaciyalawda paydalanılatuǵın qurallar, sanaciyalawdan názerde tutılǵan tiykarǵı maqsetler, banklerdi erkin hám májbúriy saplastırıw boyınsha qaǵıydalar belgilenbekte. Amanatshılar hám kreditorlardıń máplerin qorǵaw, banklerdiń byudjet qarjılarına ǵárezliligin azaytıw, qarıydarlardıń bank sistemasına isenimin arttırıw názerde tutılmaqta.

Muhtarama KOMILOVA,
ÓzAnıń xabarshısı