Oraylıq bankte máhálle bankiri hám járdemshi-agentlerdiń jumısın tártipke salıw hám muwapıqlastırıw máselelerine baǵıshlanǵan oqıw-seminar bolıp ótti.

Seminarda máhállelerge biriktirilgen 31 kommerciyalıq bank hám Oraylıq Banktiń aymaqlıq basqarmaları jáne Kámbaǵallıqtı qısqartıw hám bántlik ministrliginiń juwapkerleri qatnastı.
Ilaj dawamında xalıqtıń bántligin támiyinlew, olardı dáramatlı jumısqa tartıw, rásmiy emes miynet penen bánt bolǵanlardı bank sistemasına alıp kiriw wazıypaların máhálle bankirleri hám járdemshi-agentler menen ámelge asırıw mexanizmi hám instrumentleri haqqında sóz etildi.
Atap aytqanda, 71 awır kategoriyadaǵı rayonlarda jumıslardı jolǵa qoyıw hám 60 aldıńǵı rayonlardı bunnan bılay da rawajlandırıw, máhálle bankiriniń jumısın jolǵa qoyıw, muwapıqlastırıw hám tártipke salıw kóleminde «Sayxunabad», «Máhálle joybarı», «Parkent» tájiriybesi, «Bir kontur – bir ónim» principi tiykarında joybarlardı ámelge asırıw hám «bank-kredit.uz» platforması arqalı jumıslardı shólkemlestiriw máseleleri dodalandı.
Sonday-aq, bizneske birinshi qádem, isbilermenlikti úzliksiz qollap-quwatlaw baǵdarlamalarınıń mazmun-mánisi, járdemshi-agentler menen islesiw sisteması sheńberinde bank xızmetlerin ǵalaba en jaydırıw, esap betler ashıw sıyaqlı wazıypalar jáne máhálle bankirleri hám járdemshi agentlerdi turaqlı oqıtıw sisteması túsindirildi.
Seminar juwmaǵında qatnasıwshılar arasında soraw-juwaplar ótkerilip, áhmiyetli usınıslar bildirildi. Sonday-aq, dodalawlar nátiyjesinde hár bir qatnasıwshıǵa tiyisli kórsetpeler berilip, aldaǵı jumıslar boyınsha anıq baǵdarlar belgilendi.

Shahnoza Mamaturopova,
ÓzAnıń xabarshısı