Ádillik ministrligi tárepinen 2024-jılı 2 mıń 93 normativlik-huqıqıy hújjet joybarı huqıqıy ekspertizadan ótkerilip, ministrliktiń baslaması menen 286 joybar islep shıǵıldı.
Mámleketlik xızmetler orayları arqalı kórsetiletuǵın 70 ten artıq jańa túrdegi xızmetler engizilip, olardıń jámi sanı 409ǵa jetkerildi. 144 xızmet ápiwayılastırıldı. 13 licenziya, ruqsat beriw hám xabardar etiw tártibi biykar etildi.
Biznesti qollap-quwatlaw hám onı shólkemlestiriwde jeńillik jaratıw maqsetinde 3 ayǵa shekemgi «ótiw hám beyimlesiw dáwiri»n belgileytuǵın «Bizneske licenziyasız kiriw» (Zero Licensing) arnawlı rejimi eksperiment túrinde engizildi.
Bul Ádillik ministrliginiń 2024-jıl dawamında ámelge asırılǵan jumıslar, jol qoyılǵan kemshilikler hám keleshektegi wazıypalardı dodalawǵa baǵıshlanǵan kollegiya májilisinde atap ótildi.
«Adliya mahalla» hám «Onlayn mahalla» platforması arqalı xalıqtıń 203 mıńnan artıq huqıqıy mashqalaları qabıl etilip, sonnan 176 mıńnan aslamı yamasa 87 procenti sheshildi. 336 mıń puqaraǵa baslanǵısh huqıqıy járdem biypul kórsetilip, 10 mıńnan artıq processual hújjet joybarları tayarlap berildi. Orınlarda 420 mıńnan aslam huqıqıy úgit-násiyatlaw ilajı ótkerildi.
Huqıqıy málimlemeni jetkeriw sanlastırılıp, barlıq nızamshılıq hújjetlerin Birden-bir huqıqıy málimleme almasıw sisteması arqalı mámleketlik uyımlar hám shólkemlerge, máhállelerge jetkeriw jolǵa qoyıldı.
Kelip túsken 270 mıń múrájattiń 88 procenti nızamlı sheshildi. Yuridikalıq xızmet kórsetiw orayları tárepinen 21 mıńnan artıq mámleketlik shólkemniń 8,4 millionnan aslam hújjet joybarına huqıqıy juwmaq berildi.
10 túrdegi notarial háreketlerdi videokonferencbaylanıs arqalı rásmiylestiriw jolǵa qoyılıp, 74 mıńnan aslam notarial háreket onlayn ámelge asırıldı. 21 mıń 573 intellektuallıq múlk obyekti mámleketlik dizimnen ótkerildi.
Dizimge alınǵan tovar belgileri, oylap tabıw, paydalı model hám selekciya jetiskenlikleri boyınsha ayrıqsha reyting qáliplestirilip, ǵalaba xabar qurallarında járiyalandı.
Bunday jumıslardıń nátiyjesinde Ózbekstan 24 jıldan soń AQSh Sawda wákilliginiń «Baqlawdaǵı mámleketler» diziminen shıǵarıldı.
X.Sulaymonova atındaǵı Respublikalıq sud-ekspertiza orayı strukturası jetilistirilip, oraydıń aymaqlıq bólimlerinde qosımsha 12 jańa ekspertiza túrleri jolǵa qoyıldı.
Májiliste tarawda ayırım mashqalalar bar ekenligi, sonıń ishinde, múrájatler menen islesiwde ayırım basshılardıń isenimsizligi hám huqıqtı qollanıw tarawındaǵı mashqalalardı sheshiwde sistemalı qatnastaǵı kemshilikler bar ekenligi atap ótildi.
Ádillik uyımları hám mákemeleriniń basshı hám juwapker xızmetkerleri qatnasqan májilis sońında bir qatar wazıypalar belgilep alındı.

N.Abduraimova,
ÓzA