Burın xabar etilgenindey, Ózbekstan delegaciyası ámeliy sapar menen Túrkiya mámleketinde bolıp tur.

Sapar barısında «Yuksalish» ulıwmamilliy háreketiniń baslıǵı Babur Bekmurodov hám Túrkiyanıń Seljuklu rayonı meri Axmet Pekyatirmachi arasında ushırasıw ótkerildi. Onda tárepler municipial xızmetlerdiń sapasın arttırıw hám eki tárepleme birge islesiwdiń perspektivaları boyınsha áhmiyetli máselelerdi dodaladı.

Ilaj sheńberinde municipal xızmetlerdiń tásirsheńligi hám nátiyjeliligi temasında prezentaciya ótkerildi. Túrkiya tárepi zamanagóy qala basqarması usılları, xızmetlerdi sanlastırıw, infrastrukturanı jaqsılaw hám puqaralardıń turmıs dárejesin arttırıw máselelerine ayrıqsha itibar qarattı.

– Biz hár qıylı tarawlarda birge islesiwimiz ushın úlken potencial bar ekeniniń gúwası bolmaqtamız. Tájiriybe almasıw menen sheklenip qalmay, aymaqlarımızdıń turaqlı rawajlanıwına qaratılǵan birgeliktegi baslamalardı islep shıǵıw áhmiyetli, – dedi Bobur Bekmurodov.

Usı kúnniń ózinde basqarma wákilleri hám biznes toparları menen sóylesiwler ótkerildi. Dodalawlar dawamında sawda-ekonomikalıq birge islesiw, investiciyalıq sheriklik hám mádeniy baylanıslardı rawajlandırıw máseleleri kún tártibine shıqtı.

– Bul ushırasıw qalalarımız arasındaǵı birge islesiwdi bekkemlew, birgeliktegi joybarlardı islep shıǵıw hám aldıńǵı tájiriybelerdi almasıw jaǵınan oǵada nátiyjeli boldı. Doslıq baylanıslarımızdı bunnan bılay da bekkemlewge xızmet etken bul áhmiyetli sapar ushın miymanlarımızǵa minnetdarshılıq bildiremen. Sherikligimiz ele de keńeyiwdi dawam etetuǵınına bekkem isenemen, – dedi Axmet Pekyatirmachi.
Sapar etiw dawamında Ózbekstan delegaciyası dıqqatqa ılayıq obyektlerdi kózden ótkerdi, elatlı punktlerde turmıs sapasın jaqsılawǵa qaratılǵan baslamalar menen tanıstı. Sonday-aq, Seljuklu tájiriybesi mısalında qánigelik arttırıw baǵdarlaması qatnasıwshılarına shıǵındılardı qayta islewdiń nátiyjeli texnologiyaların engiziw hám qayta tiklenetuǵın energiya dereklerinen paydalanıw processleri haqqında maǵlıwmat berildi. Karatay municipalitetinde iske túsirilgen arzan turaq jay baǵdarlamasınıń joybarı menen tanıstırıw ilajı ótkerildi.
Delegaciyanıń ámeliy saparı dawam etpekte.

N.Ziyodullaeva,
ÓzA