«Shańaraq hám hayal-qızlardı qollap-quwatlaw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında»ǵı nızam menen Shańaraq kodeksi, Turaq jay kodeksi, sonday-aq, «Hayal-qızlar hám erkekler ushın teńdey huqıqlar hám imkaniyatlardıń kepillikleri haqqında»ǵı nızamǵa ózgerisler hám qosımshalar kirgizilmekte.

Nızamda shańaraqlıq (turmıslıq) zorlıqtan jábir kórgenlerdiń huqıqların qorǵawdı bunnan bılay da kúsheytiw hám bunday jaǵdaylar tákirarlanıwınıń aldın alıwǵa qaratılǵan normalar názerde tutılmaqta.
Senattıń Jaslar, hayal-qızlar, mádeniyat hám sport máseleleri komitetiniń májilisinde bul nızam dodalanıp, nekeden ajırastırıw haqqındaǵı isler kórip shıǵılıp atırǵanda sud shańaraqlıq (turmıslıq) zorlıq jınayatınan jábirlengen adamnıń talabına bola jarasıw ushın máwlet tayınlanbawı belgilenip atırǵanı atap ótildi.
Nekeden ajırastırıw máselesi óz waqtında sheshilmewi ayırım jaǵdaylarda hayallardıń óz janına qastıyanlıq etiwi, mezgilsiz ólimi sıyaqlı ayanıshlı aqıbetlerdi keltirip shıǵarmaqta.
Bul normanıń ámeliyatqa engiziliwi turaqlı túrde basım hám zorlıq jaǵdayları bolatuǵın tınıshsız shańaraqlarda awır jınayatlar júz beriwiniń aldın aladı.
Nızam menen Turaq jay kodeksine qosımshalar kirgizilip, turaq jaylardan paydalanıw haqqındaǵı kelispewshilikler qarap shıǵılıp atırǵanda sud táreplerdiń kelisimine tiykarlanıp múlk iyesiniń baslaması menen turaq jayǵa májbúriy tártipte kirgizilip atırǵan tárepti múlk iyesine tiyisli sáykes sharayatlarǵa iye bolǵan basqa turaq jayǵa kirgiziw yamasa ijaraǵa alınǵan turaq jaylar ushın ijara haqısın tólew minnetlemesin múlk iyesine júklewi múmkin ekeni názerde tutılmaqta.
Nızamnıń qabıl etiliwi hayal-qızlardıń huqıqların bunnan bılay da bekkemlewge, olardıń turaq jay máselelerin nızamlı sheshiwge xızmet etedi.
Senatorlar, ministrlik hám uyımlardıń juwpakerleri, ekspertler, sonday-aq, aymaqlardan jergilikli keńeslerdiń Jaslar siyasatı, mádeniyat hám sport máseleleri komissiyaları jáne Jaslar parlamenti aǵzaları qatnasqan májiliste tiyisli qarar qabıl etildi.

N.Abuduraimova,
ÓzA