Usı kúnlerde Innovaciyalıq rawajlanıw agentliginiń direktorı Sharof Rajabboev basshılıǵındaǵı delegaciya xızmet saparı menen Birlesken Arab Ámirlikleriniń Dubay qalasında bolıp turıptı.

Sapar waqtında delegaciya hám Shorlanıw sharayatında biodiyqanshılıq xalıqaralıq orayı (ICBA) baslıǵı Tarifa Alzaabi arasında ushırasıw ótkerildi. Onda tárepler óz-ara birge islesiw perspektivaları boyınsha pikir alıstı.
Soń Innovaciyalıq rawajlanıw agentligi hám ICBA arasında kelisim memorandumına qol qoyıldı.
Oǵan bola, tárepler ilimiy hám ilimiy-texnikalıq materiallar, basılımlar hám basqa tiyisli maǵlıwmatlardıń almasıwın jolǵa qoyadı. Sonday-aq, ózbestanlı jas ilimpazlar hám izertlewshiler ushın ilimiy stajirovkalar shólkemlestiriledi.
Atap ótilgenindey, ICBA 1999-jılı shólkemlestirilgen xalıqaralıq kommerciyalıq emes awıl xojalıǵı izertlew orayı bolıp, húkimetlik hám mámleketlik emes shólkemler hám izertlew institutları menen birge islesedi. ICBA shorlanǵan jerlerge iye aymaqlarda awıl xojalıǵınıń turaqlılıǵın arttırıwda áhmiyetli rol atqaradı hám global azıq-awqat qáwipsizligin jaqsılawǵa úles qosadı. Búgingi kúnde oray izertlewleri 30 dan aslam mámlekette qollanılmaqta.
Ushırasıw juwmaǵında tárepler kelisim memorandumı tiykarında birge islesiw qatnasıqların bekkemlewge kelisip aldı.
Agentlik málimleme xızmetine bola, sapar dawamında delegaciya ICBAnıń tájiriybe maydanlarında ámelge asırılǵan izertlewler, BAÁdegi topıraq muzeyi hám shorlanıwǵa shıdamlı ósimlikler genbanki jumısı menen de jaqınnan tanıstı.

N.Ziyodullaeva, ÓzA