Ózbekstan hám Italiya arasındaǵı strategiyalıq birge islesiwdiń házirgi jaǵdayı hám onı jáne de rawajlandırıw baǵdarında alıp barılıp atırǵan jumıslar kólemi keńeyip barmaqta.
«Rawajlanıw strategiyası» orayınıń atqarıwshı direktorı Еldor Tulyakov Italiya Respublikasınıń Ózbekstandaǵı Ayrıqsha hám tolıq huqıqlı elshisi mırza Pergabriele Papadiya de Bottini menen ushırastı.
Sóylesiw waqtında tárepler «Rawajlanıw strategiyası» orayı hám Italiya elshixanası arasındaǵı nátiyjeli birge islesiwdi joqarı bahalap, Italiyadaǵı jetekshi shólkemler menen ornatılǵan baylanıslardı jáne de bekkemlewge kelisip aldı.
Atap aytqanda, ilimiy hám analitikalıq tarawlarda turaqlı pikir almasıw, birgeliktegi basılımlardı tayarlaw, qánigelerdiń mamanlıǵın arttırıw maqsetinde oqıw baǵdarlamaları hám treningler shólkemlestiriw áhmiyetli ekenligi atap ótildi. Sonday-aq, Italiya ekspertlerin tartıw, aldıńǵı tájiriybelerdi úyreniw hám dógerek sáwbetleri, konferenciyalar hám ilimiy-izertlew joqbarları arqalı óz-ara birge islesiwdi rawajlandırıw boyınsha pikir alısıwdı dawam ettiriwge tayar ekenligin bildirdi.
Ushırasıw ashıq hám konstruktivlik ortalıqta ótip, keleshekte birge islesiw perspektivaların turaqlı túrde dodalawǵa kelisip alındı.
Abdulaziz RUSTAMOV,
ÓzA