Oliy Majlis Nızamshılıq palatasınıń májilisinde kreditorlardıń girew menen támiyinlengen talapların qanaatlandırıw sistemasın jáne de jetilistiriwge qaratılǵan nızam joybarı ekinshi oqıwda statyama-statya kórip shıǵıldı.
Atap ótilgenindey, ámeliyatta qarızdar tárepinen kredit (ipoteka) shártnaması boyınsha minnetlemeler óz waqtında yamasa kerekli dárejede orınlanbaǵanda kreditordıń (banktiń) girew menen támiyinlengen talapların suddan tısqarı tártipte girew múlkine qaratıw, girewge alıwshınıń girew predmetine bolǵan huqıqlarınıń ústinligin támiyinlewde bir qatar mashqalalar bar.
Atap aytqanda, múlkti girewge alıwda basqa shaxs kelisimi yamasa uyımnıń ruqsatı menen alınǵan bolsa, girewge alıwshınıń bul múlk girewi menen támiyinlengen talapları tek ǵana sud tártibinde qanaatlandırılatuǵını belgilengen. Sonıń menen birge, ipotekaǵa alıwshı talapların ipoteka esabınan suddan tısqarı tártipte qanaatlandırıw tamamlanǵannan soń qarızdar minnetlemesiniń qaplanbaǵan bólegin qarızdardıń basqa múlki esabınan sóndiriw huqıqınıń joq ekenligi qarızdarlıqlardı sudtan tısqarı tártipte óndiriw ámeliyatınıń rawajlanıwına tosqınlıq etpekte.
Usı nızam joybarı menen minnetlemeler orınlanıwınıń támiynatı sıpatında usınılǵan múlkke kreditorlar huqıqlarınıń ústinligin támiyinlew, girewge qoyılǵan múlkti aukcion arqalı satıw tártibin jetilistiriw hám erkin bahalawshı shólkemdi tartqan halda múlktiń baslanǵısh satıw bahasın bazar bahasınan kelip shıǵıp belgilew, sonday-aq, girew menen támiyinlengen minnetlemelerdi suddan tısqarı tártipte óndiriw ámeliyatın jetilistiriwge itibar qaratılmaqta.
Múlkti girewge alıwda basqa shaxs kelisimi yamasa organnıń ruqsatı alınǵan bolsa, girewge alıwshınıń usı múlk girewi menen támiyinlengen talapların sudqa shekem qanaatlandırıw tártibi belgilenbekte.
Usı nızam joybarınıń qabıl etiliwi kreditorlardıń girew múlkine huqıqlarınıń ústinligin támiyinlew, girewdegi zatın sudtan tısqarı tártipte realizaciyalaw sistemasın jetilistiriw, minnetlemeni girewdegi múlk esabınan óndiriw processlerin ápiwayılastırıw hám kredit shólkemleriniń kredit portfelindegi mashqalalı aktivler úlesiniń azayıwına xızmet etedi.
M.Komilova,
ÓzA