Ózbekstan Respublikası Prezidenti Shavkat Mirziyoev 7-fevral kúni Yaponiya Bas ministriniń arnawlı keńesgóyi Akixisa Nagasima basshılıǵındaǵı delegaciyanı qabılladı.

Ózbekstan menen Yaponiya arasında doslıq hám strategiyalıq sheriklik qatnasıqların bunnan bılay da bekkemlew, kóp tárepleme birge islesiwdi hám ámeliy sheriklikti keńeytiwdiń áhmiyetli máseleleri kórip shıǵıldı.
Arnawlı keńesgóy Akixisa Nagasima mámleketimiz basshısına Yaponiya Bas ministri Sigeru Isibanıń sálemin hám jeke xatın jetkerdi.
Yaponiya Ózbekstanda nızam ústinligine tiykarlanǵan erkin hám ashıq-aydın xalıqaralıq birge islesiwdi támiyinlewde hám bekkemlewde óziniń isenimli hám uzaq múddetli strategiyalıq sherigin kórip atırǵanı atap ótildi.
Yaponiya húkimeti ekonomikalıq hám innovaciyalıq birge islesiw, energetika, sanaat, infrastruktura hám sociallıq tarawlardaǵı kooperaciya, jedel bilimlendiriw hám mádeniy almasıwlar, turizm hám miynet migraciyası baǵdarlamaları, sonday-aq, nátiyjeli regionallıq birge islesiw sıyaqlı keń kólemli baǵdarlarda eki tárepleme qatnasıqlar jedel rawajlanıp atırǵanı ayrıqsha atap ótildi.
2024-jılı mámleketler arasındaǵı tovar almasıwdıń kólemi 35 procentke arttı. Yaponiyanıń jetekshi kompaniya hám bankleri menen joybarlar portfeli 12 milliard dollardan zıyattı quramaqta. Ózbekstanda 100 ge shamalas birgeliktegi kárxana hám shólkemler, sonıń ishinde, Ózbekstan-Yaponiya orayı tabıslı jumıs alıp barmaqta.
Ózbekstan jetekshisi joqarı dárejedegi qızǵın sóylesiwler hám óz-ara saparlardı dawam ettiriw zárúrligin atap ótti. Sawda-ekonomikalıq, investiciyalıq hám qarjılıq-texnikalıq tarawlardaǵı, sonıń ishinde Yaponiya húkimetiniń Rawajlanıwǵa járdemlesiw baǵdarlaması sheńberindegi birge islesiwdiń kún tártibi mazmunlı ekeni qanaatlanıwshılıq penen atap ótildi.
Ózbekstan Prezidenti Yaponiya húkimetine usı jıldıń aprel ayında Osaka qalasında baslanatuǵın «Еkspo» pútkil jer júzilik kórgizbesin tabıslı ótkeriwin tiledi.
Bolajaq «Oraylıq Aziya + Yaponiya» formatındaǵı birinshi sammitke tayarlıq sheńberinde regionallıq birge islesiw máseleleri boyınsha pikir alısıldı.

ÓzA