Senattıń Byudjet hám ekonomikalıq máseleler komiteti májilisinde gezektegi jalpı májilis kún tártibine kirgiziliwi rejelestirilgen puqaralardı hám isbilermenlik subyektlerin qarjılay qollap-quwatlawǵa baylanıslı bir qatar nızamlar dáslepki tárizde kórip shıǵıldı.

«Kredit málimlemesi almasıwı haqqında»ǵı Ózbekstan Respublikası nızamına kredit tarawındaǵı qatnasıqlardı jáne de jetilistiriwge qaratılǵan ózgerisler menen qosımshalar kirgiziw haqqındaǵı nızam dodalandı.
Usı nızam menen ámeliyatqa fizikalıq tárepler menen kredit kelisimlerin dúziwge sheklew belgilew hám onı alıp taslawǵa bolǵan huqıqlar, olardı kredit kelisimin dúziw qadaǵan etilgen shaxslar reestrine kirgiziwdiń tártibi hám shártleri, kredit málimlemesinen paydalanıwshılardıń belgilengen sheklewdi buzǵan halda kredit kelisimi dúzilgeni ushın juwapkershiliktiń belgileniwin názerde tutatuǵın bir qatar ózgerisler menen qosımshalar kirgizilip atırǵanı aytıp ótildi.
«Isbilermenlik subyektlerin qarjılay qollap-quwatlaw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı nızam bolsa isbilermenlik subyektleri tárepinen qarjılay xızmetlerden paydalanıw imkaniyatın keńeytiw hám biznesti qarjılandırıwdıń nátiyjeli quralların engiziw, faktoring boyınsha zamanagóy nızamshılıq bazasın jaratıw, faktoring operaciyaların rawajlandırıw hám engiziwge xızmet etetuǵını atap ótildi.
Bunnan tısqarı, «Salıq hákimshiliginiń jetilistiriliwi, sonday-aq, salıqqa baylanıslı huqıqbuzarlıqlar ushın juwapkershilik hám valyutanı tártipke salıw liberallastırılıwı múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı hám «Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı nızamlar dáslepki tárizde kórip shıǵıldı.
Májilis juwmaǵında kórilgen máseleler boyınsha komitettiń tiyisli qararları qabıl etildi.

N.Abduraimova, ÓzA