Mámleketimizde jınayatshılıqqa qarsı gúresiw, huqıqbuzarlıqlardıń waqtında aldın alıw hám jámiyetlik tártipti saqlawdıń ulıwma jańa mexanizmleri jaratılmaqta.

Senattıń Qorǵanıw hám qáwipsizlik máseleleri komiteti tárepinen shólkemlestirilgen seminarda usı haqqında sóz bolıp, jınayatshılıq boyınsha «qızıl» kategoriyadaǵı aymaqlarda jaǵdaydı turaqlastırıw baǵdarında alıp barılıp atırǵan jumıslar ústinen nátiyjeli deputatlıq qadaǵalawdı ámelge asırıw máselelerine itibar qaratıldı.
Prezidentimizdiń 2025-jıl 3-yanvardaǵı «2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń waqtında aldın alıw sistemasınıń nátiyjeliligin jáne de arttırıw boyınsha ilajlar haqqında»ǵı qararınıń mazmun-mánisi de tolıq túsindirildi.
Ilajda bıyılǵı jıl 23-25-yanvar kúnleri bolıp ótken Senattıń 3-jalpı májilisinde kórilgen huqıqbuzarlıqlardıń profilaktikası hám jınayatshılıqtıń aldın alıwǵa xızmet etetuǵın bir qatar nızamlar kórip shıǵılǵanı hám maqullanǵanına da toqtap ótildi.
Seminar aymaqlarda huqıqbuzarlıqlardıń aldın alıw baǵdarında ámelge asırılıp atırǵan jumıslar boyınsha deputatlıq qadaǵalawdı alıp barıw hám bul baǵdarda turaqlı komissiyalardıń ámeliy kónlikpelerin arttırıwdan ibarat bolǵanı ushın «Ishki isler uyımları haqqında»ǵı nazımnıń bir qatar normalarınıń mazmun-mánisine de itibar qaratıldı.
Sonıń ishinde, 131-statyasında Ishki isler ministrligi aymaqlıq bólimleri basshılarınıń Qaraqalpaqstan Respublikası Joqarǵı Keńesi, xalıq deputatları keńesleri aldında esap beretuǵını atap ótildi.
Biraq, ayırım jergilikli keńeslerde 2023-2024-jıllarda ishki isler uyımları aymaqlıq bólimleri basshılarınıń esabatların tıńlawda rásmiy hám júzeki múnásibetke jol qoyıw jaǵdayları da baqlanǵanı sınǵa alındı.
Senatorlar, jergilikli keńeslerdiń Korrupciyaǵa qarsı gúresiw hám qáwipsizlik máseleleri boyınsha turaqlı komissiyalarınıń basshıları, aǵzaları hám sekretariat baslıqları, sonday-aq, Qaraqalpaqstan Respublikası IIM, Tashkent qalası hám Tashkent wálayatı IIBB, wálayatlar ishki isler basqarmalarınıń usı baǵdarǵa juwapker bolǵan basshınıń orınbasarları hám rayonlıq hám qalalıq ishki isler bólimleriniń basshıları qatnasqan ilajda keleshekte bunday qáte-kemshiliklerge shek qoyıw zárúr ekenligi atap ótildi.
Senattıń Qorǵanıw hám qáwipsizlik máseleleri komiteti tájiriybesinen kelip shıqqan halda aymaqlıq ishki isler uyımları basshılarınıń esabatların tıńlawda qosımsha túrde qanday máselelerge itibar qaratıw zárúr ekenligi boyınsha pikir-usınıslar berildi.

N.Abduraimova, ÓzA