Respublikalıq qánigelestirilgen urologiya ilimiy-ámeliy orayınıń jámááti ótken jıldı tabıslı juwamqlap, 2025-jılǵa mólsherlengen maqset hám wazıypalardı orınlawǵa kirisip ketken. Barlıq háreketler kórsetilip atırǵan medicinalıq xızmettiń sapasın jáne de jaqsılaw hám xalıqqa qosımsha qolaylıqlar jaratıwǵa qaratılǵan.
Mákeme direktorı Shuxrat Muxtorovtıń DSM baspasóz xızmetine bergen maǵlıwmatına bola, bıyılǵı jılı orayda 10, aymaqlıq filliallarda 8 hám rayon (qala)lıq emlewxanalarda 4 jańa diagnostika hám emlew usılın engiziw názerde tutılǵan.
– Onıń nátiyjesinde sidik-tas keselligine shatılǵan nawqaslardıń artıqsha waqıt hám qarjı jumsap, paytaxtımızǵa qatnawı sezilerli dárejede azayadı, – deydi ol.
Sonday-aq, qánigelesken medicinalıq járdem xızmetin rayonlar dárejesine túsiriw maqsetinde 2025-jılı Namangan wálayatınıń 4 rayonı hám qalasında birinshi márte uroflometriya diagnozlaw usılı jolǵa qoyıladı.
Oraydıń 54 joqarı maman shıpakeri aymaqlarǵa jańa diagnostika hám emlew usılların engiziw ushın jiberiledi. Sonday-aq, tájiriybe almasıw, sheberlik sabaqların shólkemlestiriw, jańa texnologiyalardı engiziw hám aymaqlarda medicinalıq tekseriwler hám operaciyalardı ótkeriw maqsetinde Rossiya, Germaniya, Hindstan, Túrkiya sıyaqlı mámleketlerden qánigelerdi tartıw rejelestirilgen. Aymaqlıq filiallarda jumıs islep atırǵan xızmetkerlerden 26 sı sırt elde, 29 ı respublikalıq mákemelerde, oray shıpakerlerinen segizinen tórtewi sırt mámlekettegi jetekshi klinikalarda mamanlıǵın arttıradı.
Qánigeler tárepinen 4 baǵdar boyınsha ilimiy izleniwler alıp barıladı. Bunnan tısqarı, 2 urolog hám 2 anesteziolog kandidatlıq dissertaciyasın qorǵaydı.
Oray hám onıń aymaqlıq filliallarınıń materiallıq-texnikalıq bazasın jaqsılaw 2025-jılı da izbe-iz dawam ettiriledi. Kuveyttiń Arab ekonomikalıq rawajlanıw fondı qarjıları esabınan 12 túrdegi diagnoz hám emlew ámeliyatları ushın paydalanılatuǵın ásbap-úskeneler alıp kelinedi.
Qısqasha aytqanda, oray jámááti 2025-jıl dawamında xalıqqa sapalı medicinalıq xızmet kórsetiwge baylanıslı wazıypalardı joqarı juwapkershilik hám sadıqlıq penen orınlap, xalıqtı razı etiwdi bas maqset sıpatında belgilegen.
M.Qosimova, ÓzA