Keyingi jıllarda mámleketimiz basshısınıń tiyisli qararına muwapıq elimizdiń barlıq aymaqlardaǵı medicina mákemeleriniń jumısın sanlastırıw ilajları kórilmekte. Usı maqsette zamanagóy texnologiyalar ózlestirilmekte hám «aqıllı» úskeneler alıp kelinip ornatılmaqta.

Bul baǵdardaǵı háreketlerdiń logikalıq dawamı sıpatında «Еlektron poliklinika» hám «Еlektron recept» baǵdarlamaları basqıshpa-basqısh turmısqa engizilip atırǵanın keltiriw múmkin.
Usı maqsette Densawlıqtı saqlaw ministrligi hám «UZINFOCOM» birden-bir integratorı tárepinen «Densawlıqtı saqlaw sistemasınıń sanlı transformaciyası» temasındaǵı respublikalıq sanlı densawlıqtı saqlawdıń birden-bir platforması prezentaciyası ótkerildi.
Ilajda Densawlıqtı saqlaw, Sanlı texnologiyalar ministrlikleri hám basqa tiyisli uyımlardıń basshıları, sonday-aq, qánigelestirilgen medicina mákemeleri hám aymaqlıq basqarmalardıń wákilleri qatnastı.
Prezentaciyada sanlı medicinanıń imkaniyatları hám qolaylıqları saxna kórinisi arqalı kórsetildi. Onda medicina mákemleri jumısındaǵı sanlastırıw processleri bir shıpakerdiń turmısı mısalında ashıp berildi.
Usı jańa sistemalar arqalı shıpakerler nawqaslardıń kesellik tariyxı haqqındaǵı maǵlıwmatlardı respublikanıń qálegen aymaǵınan onlayn kóriw hám jańalaw imkaniyatına iye boladı. Prezentaciyada aldın jumıs islegen 50 den aslam málimleme sistemalarınıń birden-bir platformaǵa ótkeriliwi menen sistema paydalanıwshıları ushın bir qatar qolaysızlıqlar saplastırılǵanı atap ótildi.
Sonday-aq, sanlastırıw procesi xalıq ushın medicinalıq xızmetlerden paydalanıwda jańa qolaylıqlar jaratqanı ayrıqsha atap ótildi. Sistemalardıń turmısqa engiziliwi shıpakerlerdiń jumıs nátiyjeliligin arttırıwǵa, nawqaslarǵa bolsa jedel hám anıq medicianlıq járdem kórsetiliwine tiykar jaratadı.

N.Rahmanova, ÓzA