Sociallıq tarmaqlarda Qazaqstan kartoshka eksportına sheklew qoyǵanı, bul bolsa Ózbekstanda kartoshka bahasınıń sezilerli dárejede artıwına alıp keliwi haqqında xabarlar aylanbaqta.

Bul xabarlarǵa Awıl xojalıǵı ministrligi baspasóz xızmetiniń basshısı Dilshod Nazirov tómendegishe túsinik berdi.
«Mámleketimiz xalqınıń kartoshkaǵa bolǵan jıllıq talabı 4 million tonnanı quraydı. Ótken 2024-jılı elimizde jámi 3,7 million tonna, sonnan tiykarǵı maydanda 2,7 million tonna hám tákirar egin sıpatında 1 million tonna kartoshka jetistirilgen. Bul ónimniń 600 mıń tonnası keyingi máwsimde egiw ushın tuqımlıq sıpatında rezerv etilgen hám tábiyǵıy shıǵın 100 mıń tonna (3 procent) átirapında belgilengen.
2024-2025-jıldıń qıs hám báhár máwsimi ushın jergilikli hákimlikler tárepinen tartılǵan tayarlaw kárxanaları tárepinen 245,5 mıń tonna kartoshka rezervke jıynalǵan hám fsp.agro.uz onlayn platforması arqalı subyektler kesiminde monitoringi jolǵa qoyılǵan. Rezervke jıynalǵan ónimdi ishki tutınıw bazarına shıǵarıw boyınsha Еkonomika hám qarjı ministrliginiń hár 10 kúnlik tarmaq kestesi aymaqlar kesiminde tastıyıqlanıp, orınlanıwın támiyinlew boyınsha Qaraqalpaqstan Respublikası Ministrler Keńesi, wálayatlar hám Tashkent qalası hákimliklerine jiberilgen. Bıyıl 20-yanvar jaǵdayına jergilikli hákimlikler tárepinen tartılǵan tayarlaw kárxanaları tárepinen jámi 6,3 mıń tonna kartoshka ishki bazarlarǵa sawdaǵı shıǵarılǵan, rezerv qaldıǵı 239,2 mıń tonnanı quraydı. Ózbekstan bazarlarında kartoshka bahasınıń artıwı haqqındaǵı tarqalǵan xabarlar tiykarsız».
Qánige bazarlardaǵı kartoshkalardıń bahası boyınsha turaqlı qadaǵalaw alıp barılatuǵının hám kartoshka bahalarınıń muwapıqlastırıp barılatuǵının aytıp ótken.

M.Toshqoraeva, ÓzA