Ózbekstannıń barlıq rayon hám qalalarındaǵı awıl xojalıǵı hám azıq-awqat tarawı kórsetkishlerin tolıq qamtıp alıwshı «Ombor kitobi» joybarı sanlastırıldı.

Agrar hám azıq-awqat tarawlarındaǵı strategiyalıq maqsetlerdi ámelge asırıwǵa qaratılǵan bul joybar Prezident Shavkat Mirziyoevtiń basshılıǵında 2024-jıldıń juwmaqlarına baǵıshlap ótkerilgen májiliste belgilengen tiykarǵı wazıypalar tiykarında islep shıǵılǵan. Bul mámlekettiń azıq-awqat qáwipsizligin támiyinlewde áhmiyetli qádem bolıp esaplanadı.
«Agrosanaattı sanlastırıw orayı» JShJ tárepinen islep shıǵılǵan bul sistema «jer balansı», «suw balansı», «azıq-awqat balansı», «investiciya-eksport» sıyaqlı tiykarǵı baǵdarlardaǵı maǵlıwmatlardı basqaradı. Bul arqalı awıl xojalıǵı ónimlerin jetistiriwdiń nátiyjeliligi artadı.
Onda wazıypalar monitoring etiledi hám orınlaw processleri tikkeley baqlap barıladı. Sonday-aq, málimleme sisteması menen jumıs alıp barıwdı jolǵa qoyıw maqsetinde Qaraqalpaqstan Respublikası Awıl xojalıǵı ministrligi, wálayatlar basqarmaları hám rayonlıq bólimlerdiń wákilleri ushın seminar-treningler shólkemlestirildi.
«Ombor kitobi»nıń tiykarǵı maqseti – azıq-awqat qáwipsizligi strategiyasın jetilistriw, awıl xojalıǵı resursların nátiyjeli basqarıw hám eksport imkaniyatların arttırıwdan ibarat. Usı jıl dawamında Qaraqalpaqstan Respublikası Ministrler Keńesi hám wálayatlar hákimlikleri menen belgilengen prognoz parametrlerge erisiw boyınsha sistemalı jumıslar alıp barıladı.
Bul joybardıń ámeliyatqa engiziliwi Ózbekstan awıl xojalıǵı tarawın zamanagóylestiriw hám global básekige shıdamlılıqtı arttırıwda úlken jetiskenliklerge alıp keliwi kútilmekte, delinedi Awıl xojalıǵı ministrligi maǵlıwmatında. Qalaberdi, bul sistema ulıwma processler dawamında jáne de jetilistirilip barıladı.

ÓzA