Ózbekstan hám AQSh arasındaǵı awıl xojalıǵı tarawındaǵı birge islesiw qatnasıqları jańa basqıshqa kóterilmekte. Bul baǵdarda eki tárepleme baslama jańa joybarlardı ámelge asırıw baǵdarındaǵı jumıslar keńeymekte.
Awıl xojalıǵı ministri orınbasarınıń wazıypasın atqarıwshı Jamshid Abduzuxurov AQShtıń CNFA shólkeminiń wákilerri menen ushırasıw ótkerdi.
Onda eki tárepleme birge islesiw qatnasıqların jolǵa qoyıw, jańa joybarlardı ámeliyatqa engiziw máseleleri dodalandı.
Atap aytqanda, azıq-awqat qáwipsizligin támiyinlew klimat ózgeriwi mashqalalarına qarsı gúresiw baǵdarında CNFA shólkemi menen birgelikte jańa joybarlardı engiziw, onda AQSh tájiriybesin Ózbekstanda engiziw máseleleri dodalaw orayında boldı, delinedi Awıl xojalıǵı ministrliginiń maǵlıwmatında.
AQSh shólkemi joybarlardı engiziwde azıq-awqat ónimlerin saqlaw, suwdı únemlewshi texnologiyalardı engiziw, awıl xojalıǵı ónimlerin qadaqlaw hám bir qansha baǵdarlarda óz usınısların bildirip ótti.
Ushırasıw juwmaǵında klimattıń ózgeriwine qarsı gúresiw baǵdarındaǵı birge islesiw qatnasıqların jolǵa qoyıw hám joybarlar boyınsha juwmaqlawshı usınıslar islep shıǵıwǵa kelisip alındı.
M.Hojiakbarova, ÓzA