Házirgi waqıtta Oliy Majlis Nızamshılıq palatasınıń gezektegi májilisi óz jumısın basladı.
Májilisti kiris sózi menen ashqan Nızamshılıq palatası Spikeri N.Ismoilov Prezidentimizdiń basshılıǵında áhmiyetli taraw hám tarmaqlardı rawajlandırıw perspektivaları boyınsha ótkerilgen bir qatar ilajlarǵa toqtap, belgilengen wazıypalardıń orınlanıwın qadaǵalawda deputatlar aldında áhmiyetli wazıypalar turǵanın atap ótti:
– Bıyılǵı jıldıń 13-dekabr kúni mámleketimiz Prezidentiniń basshılıǵında sociallıq qorǵaw tarawındaǵı jumıslardıń nátiyjeliligin hám 2025-jıl ushın tiykarǵı wazıypalardı dodalaw boyınsha videoselektor májilisi ótkerildi. Májiliste tarawda ámelge asırılıp atırǵan keń kólemli jumıslar tereń tallandı, keleshekte ámelge asırılatuǵın anıq ilajlar belgilep berildi.
Mámleketimiz basshısı sociallıq qorǵaw sistemasın kúsheytiwge baylanıslı jańa baslamalardı alǵa qoydı. Bul baslamalar xalıqtıń ázzi qatlamlarınıń qorǵalıwın jáne de kúsheytiw, mayıplıǵı barlarǵa say infrastruktura jaratıw, olardı jumıs penen támiyinlew hám bilim alıw ushın imkaniyatlardı keńeytiwge qaratılǵanı menen de ayrıqsha áhmiyetke iye.
Sonıń ishinde, kelesi jılı 1 million 200 mıń xalıqtı kámbaǵallıqtan shıǵarıw ushın bilimlendiriw, dógerek, kásip-óner, medicina máseleleri sheshiledi hám jasaw sharayatı jaqsılanadı. Kámbaǵallıq joqarı mıń máhállede jáne birewden shańaraqlıq baqsha jumısı jolǵa qoyıladı. Jańa jıldan shańaraqlıq baqsha orınlarınıń 15 procentine kámbaǵal shańaraqtıń perzentleri qabıl etiledi hám baqsha tólemi qaplap beriletuǵını belgilendi. Kámbaǵal shańaraqtıń perzentleriniń oqıwı ushın qosımsha imkaniyatlar jaratıladı, atap aytqanda, 118 mıń jastı shet tili, málimleme texnologiyaları hám kásip-ónerge oqıtıw názerde tutılmaqta.
Ulıwma aytqanda, sociallıq qorǵaw sisteması baǵdarındaǵı wazıypalardıń turmısqa engiziliwi sociallıq qorǵaw sistemasınıń anıq hám nátiyjeli islewine, járdemge mútáj xalıqtıń turmıs dárejesin arttırıwǵa hám jámiyette sociallıq ádillik hám teńlik bolıwına xızmet etetuǵını gúmansız.
Kúni keshe mámleketimiz Prezidentiniń basshılıǵında jáne bir áhmiyetli másele – banklerdiń qatnasıwında máhállelerde xalıqtıń bántiligin támiyinlew hám dáramatlı etiwge qaratılǵan tiykarǵı wazıypalardı dodalaw boyınsha videoselektor májilisi ótkerildi.
Máhálleler, awıllar, xalıqtıń shańaraqlarında isbilermenlikti rawajlandırıwǵa bankler tárepinen kórsetilip atırǵan járdemniń nátiyjesinde kóplegen xalıq jumıslı, dáramatlı bolıp atırǵanın atap ótiw kerek. Máselen, tek ǵana Sırdárya wálayatı Sayxunabad rayonındaǵı 3 mıń 200 shańaraqta joybarlar iske qosılǵan, 12 mıń adam óziniń qıytaq jerinde dáramat tabıwdı úyrengen.
Bankler bul baǵdardaǵı unamlı tájiriybelerdi keńeytip, xalıqqa járdem bolıwı zárúr ekenligi atap ótildi. Mámleketimiz basshısı 2025-jıldı bántlikti támiyinlew hám kámbaǵallıqtı azaytıwda eń áhmiyetli hám sheshiwshi jıl bolatuǵının ayrıqsha atap ótti.
Májiliste bul baǵdardaǵı jańa imkaniyatlar hám rejeler hár tárepleme kórip shıǵıldı. Sonıń ishinde, bankler, shańaraqlıq isbilermenlik baǵdarlaması sheńberinde kredit alıp, dáramatlı bizneske iye bolǵan qarıydarlardı qollap-quwatlap, kishi hám orta biznes dárejesine alıp shıǵıw, hám investiciya alıp keletuǵın, hám kóp jumıs ornın jarattatuǵın startap joybarlardı qollap-quwtlaytuǵını belgilendi.
Mámleketimiz basshısı tárepinen kóterilgen jáne bir áhmiyetli másele – kredit qarızı esabınan girewdi sud arqalı óndiriwge kóp waqıt ketip atırǵanı boldı. Bul baǵdardaǵı nızamshılıqtı ózgertiw, onda girewge bank huqıqlarınıń ústinligin hám óndiriwge qaratılǵan múlkler tezirek satılıwın názerde tutıw zárúr ekenligi atap ótildi.
Prezidentimiz tárepinen alǵa qoyǵan baslamalar hám belgilep berilgen wazıypalar óz waqtında ámelge asırılıwı parlament aǵzalarına da ózine tán juwapkershilik júkleydi. Bárinen burın, bul baǵdardaǵı jumıslardı nátiyjeli shólkemlestiriwdi názerde tutatuǵın ilajlardı kelesi jılǵı jumıs rejelerimizge kirgiziwimiz kerek boladı. Deputatlarımız májilislerde belgilengen wazıypalardıń orınlarda orınlanıwı ústinen jámiyetlik hám deputatlıq qadaǵalawdı ámelge asırıwı zárúr, – dedi Spiker.
Muhtarama Komilova, ÓzA