Shańaraq hám hayal-qızlar komiteti tárepinen xalıqaralıq shólkemler menen birgelikte hayal-qızlardıń mashqalasına baylanıslı túrli joybarlardı ámelge asırıwǵa ayrıqsha áhmiyet qaratılmaqta.
Ózbekstan Respublikası Bas ministrdiń orınbasarı – Shańaraq hám hayal-qızlar komitetiniń baslıǵı Zulayho Mahkamova hám Aziya rawajlanıw banki wákilleriniń ushırasıwı bolıp ótti.
Bul sóylesiwden gózlengen maqset, ámelge asırılıwı múmkin bolǵan joybarlar, birge islesiwdiń perspektivaların dodalaw, eki tárepleme birge islesiw baǵdarların keńeytiwden ibarat.
Ushırasıwda miyman tárepinen engiziliwi názerde tutılıp atırǵan Texnikalıq járdem joybarı tanıstırıldı.
Komitet hám onıń 14 aymaqlıq bólimleriniń keminde 30 xızmetkeri ushın gender byudjetlestiriw, gender auditi, genderge tiykarlanǵan zorlıq-zombılıqtıń aldın alıw boyınsha treningler ótkeriw názerde tutılmaqta.
Sonıń menen birge, Másláhát keńeslerindegi jumıs barısınıń nátiyjeliligin arttırıwǵa járdem beriw, mámleketlik uyımlar Másláhát keńesleriniń jumısların rejelestiriw boyınsha ámeldegi instrukciyalardı, gender jumısınıń baǵdarlamasın kórip shıǵıw hám jańalanǵan, jetilistirilgen instrukciyaların tayarlaw máselelerine de itibar qaratıldı.
Gender máseleleri boyınsha keleshektegi birge islesiw ushın usınıslar islep shıǵıw haqqında sóylesildi.
Ushırasıw juwmaǵında Bas ministrdiń orınbasarı – Shańaraq hám hayal-qızlar komitetiniń baslıǵı Zulayho Mahkamova xalıqaralıq qarjı institutı tárepinen usınıs etilip atırǵan joybarlardıń qollap-quwatlanatuǵın hám tiyisli usınıslar bildiriletuǵının málim etti.
N.Usmonova, ÓzA