Qırǵız Respublikası Prezidenti Sadir Japarov Ózbekstan mádeniyat ministri Ozodbek Nazarbekovtı qabılladı.
Óz-ara sóylesiw dawamında Qırǵızstan jetekshisi mámleketlerimiz arasındaǵı mádeniy doslıq hám máńgi baylanıslardıń rawajlanıwı haqqında sóz etti.
– Xalıqlarımızdı kóp ásirlik doslıq hám jaqsı qońsıshılıq baylanısları birlestirip turadı, – dedi S.Japarov. – 1992-jılı diplomatiyalıq qatnasıqlar ornatılǵanınan berli eki tárepleme baylanıslar jańa basqıshqa kóterildi hám bul birge islesiwdi bekkemlewde mádeniyat tarawı áhmiyetli orın tutadı.
Prezident Sadir Japarov Ozodbek Nazarbekovtı “Qırǵız Respublikası xalıq artisti” ataǵı menen sıylıqlanǵanı menen qutlıqlap, onıń mámleketler arasındaǵı mádeniy baylanıslardı rawajlandırıw hám doslıqtı bekkemlewge qosqan úlken úlesin atap ótti.
Ózbekstan mádeniyat ministri O.Nazarbekov óz jumısına berilgen joqarı baha ushın mámleket basshısına qızǵın minnetdarshılıq bildirip, eki mámleket arasındaǵı tuwısqanlıq qatnasıqların jáne de bekkemlewge umtılatuǵının ayttı.
Sonday-aq, ministr házirgi waqıtta Ózbekstannıń jetekshi teatrları qırǵızstanlı kásiplesleri menen birgeliktegi teatr joybarın jaratıw ústinde jedel jumıs alıp barıp atırǵanın atap ótti.
Aziza Alimova, ÓzA