Mámleketimizdiń Franciyadaǵı elshixanasında «Málimleme sistemaları, maǵlıwmatlar bazaları hám jasalma intellekt tarawındaǵı tendenciya hám imkaniyatlardı úyreniw ushın mámleketlik hám jeke menshik sheriklikti úylestiriw» temasında Ózbekstan IT tarawınıń prezentaciyası bolıp ótti.

Ózbekstan Málimleme texnologiyaları hám kommunikaciyaların rawajlandırıw ministrligi, Franciyanıń “Bek Advisory” kompaniyası hám “IT Park Uzbekistan” menen birgelikte ótkerilgen ilajda ilimiy toparlardıń wákilleri, sonday-aq, Franciyanıń IT tarawı qánigeleri qatnastı.
Elshimiz Nodir Ǵaniev óziniń shıǵıp sóylegen sózinde jıynalǵanlarǵa húkimetimiz tárepinen mámleketimizde málimleme-kommunikaciya texnologiyaları (MKT) tarawın rawajlandırıw baǵdarında ámelge asırılıp atırǵan keń kólemli reformalar haqqında aytıp berdi. Sonday-aq, diplomat sońǵı bes jılda telekommunikaciya hám IT kompaniyalarınıń sanı 1,8 esege artqanı, 2023-jıldıń basınan berli respublikada 12 mıńnan artıq MKT kárxanaları jumıs alıp barıp atırǵanı hám usı tarawda 100 mıńnan artıq adam jumıs islep atırǵanı ayrıqsha atap ótildi.
Ilajda Franciyada jaylasqan málimleme sistemaların basqarıw hám biznesti rawajlandırıw joybarlarına qánigelesken “Bek Advisory” kompaniyasınıń direktorı Oybek Sodiqov sońǵı jılları Ózbekstanda málimleme-kommunikaciya texnologiyaları tarawında sezilerli rawajlanıw baqlanıp atırǵanın atap ótti.
Prezentaciya qatnasıwshılarda úlken tásirler qaldırdı hám olar bul jıyın Ózbekstan hám Franciya arasında IT texnologiyaları tarawında eki tárepleme birge islesiwdi jolǵa qoyıwda áhmiyetli orın tutatuǵınına isenim bildirdi.

Muharrama Pirmatova, ÓzA