Kúni keshe Qatar paytaxtı Doha qalasında «Alda bolıwshılıq ólshemi: diplomatiya, qarım-qatnas hám kóp túrlilik» temasında xalıqaralıq ánjuman bolıp ótti. Onda Ózbekstan Respublikası Ministrler Kabineti janındaǵı Mádeniyat hám kórkem ónerdi rawajlandırıw qorınıń baslıǵı Gayane Umerova qatnastı.
Gayane Umerova “Mádeniyat qudireti: XXI ásirde dúnya júzi diplomatiyası” temasındaǵı sektor dodalawında shıǵıp sóylep, Ózbekstannıń mádeniyat arqalı óz-ara túsinisiw hám xalıqaralıq birge islesiwdi bekkemlewdegi tájiriybesi haqqında maǵlıwmat berdi.
– Ózbekstannıń mádeniy diplomatiyadaǵı ornı biybaha. Biz Buxara biennalesi, Samarqandta ótkeriletuǵın YuNESKO Bas konferenciyasınıń 43-sessiyası, arxivlerdi sanlastırıw hám tariyxıy miyrastı zamanagóy dóretiwshilik kórqaraslar menen úylestiriwge qaratılǵan baslamalarımız arqalı xalıqaralıq birge islesiwdi bekkemlewdi maqset etkenbiz. Sonday-aq, húkimetimiz kreativ sanaattı rawajlandırıw boyınsha izbe-iz ilajlardı ámelge asırmaqta. Bul baslamalar tek ǵana mádeniy rawajlanıw emes, al ekonomikalıq ósiwge de xızmet etedi, – dedi Gayane Umerova.
Bul xalıqaralıq ánjuman Ózbekstannıń mádeniyattı rawajlandırıw boyınsha jarkın tájiriybesin kórsetip, xalıqaralıq kólemde tájiriybe almasıw ushın nátiyjeli platforma sıpatında úlken áhmiyetke iye ekenin atap ótiw kerek.

N.Ziyodullaeva, ÓzA