Birlesken Milletler Shólkeminiń Shólleniwge qarsı gúresiw haqqındaǵı konvenciyası Tárepler konferenciyasınıń (SOR16) 16-sessiyası sheńberinde Ózbekstan delegaciyası BMShtıń Azıq-awqat hám awıl xojalıǵı shólkemi (FAO) wákilleri menen ushırastı.
Sóylesiwlerde Ózbekstan delegaciyasına ekologiya, qorshaǵan ortalıqtı qorǵaw hám klimat ózgeriwi ministri Aziz Abduhakimov basshılıq etti, sonday-aq, awıl xojalıǵı ministriniń orınbasarı Alisher Shukurov ta qatnastı.
Sóylesiw procesinde birge islesiwdiń tiykarǵı baǵdarları, sonıń ishinde, klimat ózgeriwine qarsı gúresiw, qorshaǵan ortalıqtı qorǵaw hám awıl xojalıǵın turaqlı rawajlandırıw máseleleri dodalandı.
Ózbekstan delegaciyası usı tarawlardaǵı baslamalardı ámelge asırıwda kórsetip atırǵan járdemi ushın FAOǵa minnetdarshılıq bildirdi. Tiykarǵı máselelerden biri FAOnıń Ózbekstandaǵı wákilxanasınıń baslaması menen “FOLUR” joybarı sheńberinde tayarlanǵan «Ózbekstanda qum hám shań boranlardıń tásirin anıqlaw hám olardı saplastırıw ushın atmosferanı modellestiriw» esabatı boldı.
Bunnan tısqarı ushırasıw dawamında «Jasıl mákan» ulıwmamilliy baǵdarlaması, atap aytqanda, onıń sheńberinde keń kólemli túrde toǵaylaqlardı jaratıw ilajların názerde tutatuǵın birge islesiw máselelerine de ayrıqsha itibar qaratıldı.
Aralboyı regionı mashqalasın sheshiwde xalıqaralıq birge islesiwdi bekkemlewdiń áhmiyetli ekenligi, ulıwma, regionda ekologiyalıq teń salmaqlılıqtı tiklewde Oraylıq Aziya mámleketleriniń birgeliktegi is-háreketleri talap etiletuǵını atap ótildi.
Juwmaǵında tárepler sheriklikti bekkemlew, tábiyǵıy resurslardı saqlaw hám regionnıń turaqlı rawajlanıwına úles qosatuǵın birgeliktegi baslamalardı ámelge asırıwǵa sadıq ekenin tastıyıqladı.

Muhayyo Toshqoraeva, ÓzA