Búgin mámleketshilik tariyxımızda birinshi márte milliy parlamentimiz aralas saylaw sisteması tiykarında qáliplesti, jańadan saylanǵan deputatlar aldında mámleketimizdiń rawajlanıwına tiykar bolatuǵın áhmiyetli reformalardı ámelge asırıw wazıypası turıptı. Onda, xalıqaralıq tájiriybeler tiykarında jumıstı jetilistiriw, innovaciyalıq processlerdi engiziw talap etiledi.
Oliy Majlis Nızamshılıq palatasında parlament izertlewleri institutı tárepinen Konrad Adenauer atındaǵı qordıń regionallıq wákilxanası menen birgelikte «Proporcional saylaw sisteması tiykarında saylanǵan deputat jumısın shólkemlestiriwdiń Germaniya tájiriybesi» temasında xalıqaralıq ámeliy seminar ótkerildi.
Onda siyasiy partiya frakciyalarınıń aǵzaları, germaniya parlamentiniń deputatları, Parlament izertlewleri institutınıń xızmetkerleri, Konrad Adenauer atındaǵı qordıń regionallıq wákilxanası hám ǵalaba xabar qurallarınıń wákilleri qatnastı.
Atap ótilgenindey, jańalanǵan Konstituciyamız tiykarında milliy parlamentimizdiń demokratiyalıq kelbeti túp-tiykarınan ózgerdi. Parlamentimiz mámleketshilik tariyxımızda birinshi márte aralas saylaw sisteması tiykarında qáliplesti. Sonlıqtan, partiya dizimi tiykarında saylanǵan deputatlardıń jumısın nátiyjeli shólkemlestiriw úlken áhmiyetke iye.
Ilaj aldında Germaniya parlamentiniń aǵzaları sońǵı jıllarda Ózbekstan Respublikası Prezidenti basshılıǵında ámelge asırılıp atırǵan jedel reformalardı joqarı bahaladı. Bundestag deputatları tárepinen Germaniya saylaw nızamshılıǵınıń ózine tán ózgeshelikleri, deputatlardıń saylawshılar menen islesiwiniń áhmiyetli principleri haqqında tolıq maǵlıwmat berildi.
Seminar óz-ara tájiriybe almasıw tiykarında ótti. Juwmaqta deputatlardıń jumısın shólkemlestiriw boyınsha dúrkin ushırasıwlar shólkemlestiriwge kelisip alındı.

M.Komilova, ÓzA