«Salamat áwlad ushın» xalıqaralıq qayırqomlıq qorı tárepinen «Ózbekstan temir jolları» mámleketlik akcionerlik kompaniyası menen birgelikte shólkemlestirilgen gezektegi «Salamatlıq» poezdı ótken juma kúni respublikamızǵa keldi.

Ózbekstan Respublikasınıń Prezidentiniń 2017-jıl 7-fevraldaǵı qararı menen tastıyıqlanǵan «2017-2021-jıllarda Ózbekistan Respublikasın rawajlandırıwdıń bes tiykarǵı baǵdarı boyınsha Háreketler strategiyasın «Belsendi isbilermenlikti, innovaciyalıq ideyalardı hám texnologiyalardı qollap-quwatlaw jılı»nda ámelge asırıwǵa baylanıslı mámleketlik baǵdarlaması sheńberindegi ilajda Tashkent qalasınan kelgen joqarı qánigeli shıpakerler fondtıń Qaraqalpaqstan Respublikası filialınıń kóshpeli medicinalıq patronaj brigadası xızmetkerleri menen birgelikte respublikamızdıń eń shetki «Qaraqalpaqstan» hám «Jaslıq» posyolkalıq puqaralar jıyını aymaǵında xalıqtı tereńlestirilgen medicinalıq tekseriwden ótkeredi. Sonıń menen birge, aymaq turǵınlarına, respublikamızdaǵı bir qatar emlew mákemelerine, arnawlı mektep-internatlarına, «Mehribanlıq», «Miriwbet» úylerine ulıwma bahası 2 milliard 844,9 million sumlıq azıq-awqat, kiyim-kenshek, dári-dármaq, medicinalıq ásbap-úskeneler, sanitariya-gigienalıq buyımlar tapsırıladı.

Esletip ótimiz, GFR nıń «Friedensdorf International» hám «Tovarish-Hilfe fuer kinder» shólkemleri, AQSh tıń «Resource ahd Policy Exchange», «AmeriCares», «Toms Shoes» shólkemleri, respublika «Ónermentler» birlespesi, «Sharq nashryoti»akcionerlik jámiyeti, , «Jahon invest plast», «Chori plast», «Agro bio kimyo», «Best care industries», «B.H.T», «NAVROZ-PTK» juwapkershiligi sheklengen jámiyetleri hám basqalar ilajdıń qáwenderleri bolıp tabıladı.

«Salamatlıq» poezdı respublikamızda 26-aprelge shekem boladı.

D.ABIBULLAEV,

Qaraqalpaqstan xabar agentliginiń xabarshısı.