«Aymaqlıq elektr tarmaqları» akcionerlik jámiyeti málimleme xızmetiniń basshısı Faxriddin Nuralievtiń málim etiwinshe, endigiden bılay elektr energiyasınan paydalanıw qaǵıydaların buzıw menen baylanıslı huqıqbuzarlıq protokolları elektron túrde rásmiylestiriledi.

Oǵan bola, bul tártip Ózbekstan Respublikası Prezidentiniń 2023-jıl 13-fevraldaǵı «Janılǵı-energiya resurslarınan paydalanıw tarawında mámleketlik qadaǵalawdıń nátiyjeliligin arttırıw ilajları haqqında»ǵı qararına muwapıq engizilgen «E-dalolatnoma» sisteması sheńberinde ámelge asırıladı.

F.Nuralievtiń atap ótkenindey, bul sistema 2025-jıldıń 1-yanvarınan iske qosıladı. «E-dalolatnoma» sisteması tutınıwshılar tárepinen islengen huqıqbuzarlıqlardı tek ǵana elektron túrde rásmiylestiriw imkaniyatın jaratadı.

Bul bolsa energetika sistemasındaǵı korrupciyalıq jaǵdaylardı joq etiw, protokollardı operativ qáliplestiriw hám qaǵaz hújjetler aylanısın qısqartıw imkaniyatın beredi. Sonday-aq, qadaǵalaw processleri jáne de nátiyjeli shólkemlestiriliwine tiykar jaratadı. Sistemanıń engiziliwi tutınıwshılar hám qadaǵalaw uyımları arasındaǵı qatnasıqlardı anıqlastırıwda áhmiyetli qádem bolıp esaplanadı.

Bul jańasha tártip elektr energiyası tarawında nızamlılıqtı támiyinlew hám korrupciyalıq jaǵdaylardıń aldın alıwda ayrıqsha áhmiyetke iye. «E-dalolatnoma» sisteması hújjetlerdiń elektron túrde rásmiylestiriw processlerin tezlestiredi, tutınıwshılar ushın da qolaylıq jaratadı.

Sonıń menen birge, sistema qadaǵalaw mexanizmlerin bekkemlep, energetika tarawında ashıq-aydınlıqtı támiyinlewde úlken qádem boladı.

Nasiba Ziyodullaeva,

ÓzA