Arqa-Batıs áskeriy okrugine qaraslı áskeriy bólimde akademiyalıq licey hám kásip-óner kolledjleri oqıwshıları arasında «Burgut» áskeriy sport jarısınıń respublikalıq basqıshı bolıp ótti.
Ózbekstan jaslar awqamı Qaraqalpaqstan Respublikalıq Keńesi tárepinen Dene tárbiyası hám sport, Ishki isler, Densawlıqtı saqlaw, Mádeniyat ministrlikleri, Qaraqalpaqstan Respublikası Ministrler Keńesiniń Orta arnawlı kásiplik bilimlendiriw, Qorǵanıw basqarmaları menen birgelikte shólkemlestirilgen ilajdı ótkeriwdegi tiykarǵı maqset, jaslar arasında milliy oyınlarımızdı keńnen úgit-násiyatlaw, olardıń fizikalıq jaqtan shınıqqan, bárkamal áwlad bolıp jetilisiwi ushın sharayatlar jaratıw, áskeriy kásipke bolǵan qızıǵıwshılıǵın arttırıwdan ibarat.
Ilajǵa aymaqlıq basqıshlarda jeńimpaz bolǵan bes komanda qatnasıp, sheber mergen, tosqınlıqlardan atlap juwırıw, jábirleniwshige birinshi járdem kórsetiw, minalastırılǵan maydanda háreket etiw, sapta júrip qosıq aytıw, jasırın parollar menen islesiw, áskeriy ataqlardıń túri hám lawazımlar, «Ózbekstan belgileri», qarsılas topardıń bayraǵın iyelew shártleri boyınsha ózleriniń bilimlerin sınaqtan ótkerdi.
Jarıs juwmaǵında Tórtkúl bank kolledjiniń «Tınıshlıq qalqanı» komandası birinshi, Shomanay pedagogika hám xızmet kórsetiw kásip-óner kolledjiniń «Turan» komandası ekinshi, Nókis medicina kolledjiniń «Lashın» komandası úshinshi orınlardı iyeledi.
-Jaslardıń áskeriy xızmetke bolǵan qızıǵıwshılıǵın arttırıwda bul jarıs ayrıqsha áhmiyetke iye,-deydi Tórtkúl bank kolledji «Tınıshlıq qalqanı» komandasınıń sárdarı Bekzod Rajabbaev.-Komandamızdıń aǵzalarınan Zuxra Allakulova, Manzura Nurxanova, Sherzod Madaminov, Abdujalil Razzaqov hám basqalar ózleriniń bilimi, shaqqanlıǵı hám epshilligi menen kózge tústi. Bizlerdi jarısqa tayarlaǵan ustazlarımız Aybek Ataniyazov, Akmal Abdikarimov, Ózbekstan jaslar awqamı Tórtkúl rayonlıq keńesi qáwenderligindegi «Kamalak» balalar shólkeminiń baslıǵı Dilshadbek Yakubovlarǵa óz minnetdarshılıǵımızdı bildiremiz.
Jarıs qatnasıwshılarına Ózbekstan jaslar awqamı Qaraqalpaqstan Respublikalıq Keńesiniń diplom hám bahalı sawǵaları tapsırıldı.
D.ABIBULLAEV,
Qaraqalpaqstan xabar agentliginiń xabarshısı.