Usı jıl 17-aprel kúni Ózbekstan Respublikası Ministrler Kabinetinde Bas ministr A.Aripovtıń basshılıǵında videoselektor jıynalısı bolıp ótken edi.
Onda Ózbekstan Respublikası Prezidenti Sh.Mirziyoevtiń 13-aprel kúni Sırdárya wálayatı belsendileri menen ótkergen májilisindegi sociallıq taraw xızmetkerleriniń jámiyetlik jumıslarǵa májbúriy jegilip atırǵanı, bul boyınsha ayırım jergilikli basshılar tárepinen nızam buzıwshılıq hám kózboyawshılıq jaǵdaylarınıń bayqalıp atırǵanı boyınsha bildirilgen pikir-usınıslarınan kelip shıǵatuǵın wazıypalar keńnen dodalandı hám aymaqlarda atız hám tazalaw-abadanlastırıw jumıslarına medicina, bilimlendiriw mákemeleriniń xızmetkerleri, studentler hám basqa da sociallıq taraw wákillerin tartıwdı qadaǵan etiw, bul boyınsha barlıq dárejedegi basshılardıń jeke juwapkershiligin arttırıwǵa qaratılǵan ilajlar belgilep alındı.
Biz usı máseleler dógereginde Qaraqalpaqstan kásiplik awqamları shólkemleri birlespesi Keńesi baslıǵınıń orınbasarı Muratbay Daniyarovtıń pikirin tıńladıq.
– Selektor májilisinde,-deydi M.Daniyarov – Túrli sociallıq tarmaqlarda hám ǵalaba xabar qurallarında jergilikli hákimlikler tárepinen bilimlendiriw, densawlıqtı saqlaw sisteması wákillerin basqa jumıslarǵa májbúriy jegiw jaǵdayları ushırasıp atırǵanlıǵınıń keń dodalawlarǵa sebepshi bolıp atırǵanı mısallar menen keltirip ótildi.
Bıyılǵı jıldıń ótken dáwirinde ótkerilgen úyreniwler nátiyjesinde miynet nızamshılıǵı boyınsha jámi 10 mıńǵa shamalas nızam buzıwshılıq jaǵdayları anıqlanǵan. Olardıń tiykarǵı bólegi xalıq bilimlendiriwi, medicina mákemeleri esabına tuwra keledi.
Qaraqalpaqstan kásiplik awqamları shólkemleri birlespesi Keńesi tárepinen Ózbekstan Respublikası Ministrler Kabineti, Kásiplik awqamları federaciyası Keńesi hám Sawda-sanaat palatası menen birlikte sociallıq-ekonomikalıq máseleler boyınsha 2017-2019-jıllar ushın dúzilgen Bas kelisim tiykarında ótken jılı bir qatar ilajlar ámelge asırılǵan edi. Atap aytqanda, usı Kelisimge, «Májbúrlep jumsaw hám májbúriy miynet haqqında»ǵı, «Májbúriy miynetti saplastırıw haqqında»ǵı hám basqa da bir qatar xalıqaralıq shólkemlerdiń Konvenciyalarına tiykarlanıp kóplegen xalıqaralıq shólkemlerdiń wákilleriniń qatnasında tiyisli mákeme hám shólkemlerdiń qánigeleri tárepinen ushırasıwlar ótkerilip, májbúriy miynettiń aldın alıw baǵdarında kóp ilajlar ámelge asırıldı. Tiyisli monitoring jumısları ótkerilip, usı maqsette «Isenim telefon»ları tuwralı maǵlıwmatlar, 250 dana «Usınıs», 3150 dana plakat hám 28 dana banner tarqatıldı.
Biraq soǵan qaramastan ótken jıl dawamında bir qatar mákeme hám shólkem basshılarınıń nemquraydılıǵı sebepli, xalıq arasında májbúriy miynet máseleleri boyınsha narazılıqlar kelip shıqqanın aytıp ótiwimiz tiyis. Múrájatlar tiyisli tártipte úyrenip shıǵılıp, nızambuzıwshılıq halatları saplastırıldı.
Qaraqalpaqstan Respublikası Bántlik hám Miynet qatnasıqları ministrliginiń maǵlıwmatlarına qaraǵanda, 2017-jıl dawamında miynet hám xalıqtıń bántligi haqqındaǵı nızamshılıq talaplarınıń orınlanıwı boyınsha ótkerilgen tekseriwler nátiyjesi menen miynet haqqındaǵı nızam hújjetlerin buzǵanı, miynetke hákimshilik tártipte májbúrlegeni, bos jumıs orınların jasırǵanı hám basqa da huqıqbuzarlıqlarǵa jol qoyǵanı ushın jámi 419 lawazımlı shaxsqa 150 million 752 mıń 295 sum járiyma salınǵan.
Esletip ótemiz, endigiden bılay, basshılar tárepinen puqaralardı jámiyetlik jumıslarǵa májbúrlew jaǵdayları jáne baqlansa, Prezidentimizdiń atap ótkenindey, jaza qatań boladı, sonıń ishinde, jınayıy juwapkershilikke shekemgi bolǵan ilajlar kóriledi.
Á.Jiemuratov,
Qaraqalpaqstan xabar agentliginiń xabarshısı.