Oraylıq Aziyada jasaytuǵın jaslar arasında terrorizmge hám ekstremizmge májbúrlep tartıwǵa hám zorlıq etiwshi radikalizmge qarsı shıǵıw jáne ol haqqında eskertiw, qáwipler boyınsha olardıń xabardarlıǵın arttırıwǵa hám kózqarasın biliwge arnalǵan tańlaw ótkeriledi.
Ózbekstandaǵı Evropada qáwipsizlik hám birge islesiw shólkeminiń joybarlar Koordinatorı usınısı menen járiyalanǵan tańlawda aymaqtaǵı jaslar usı másele boyınsha kúndelikli turmıs tájiriybesinen mısallar keltirip, sociallıq tarmaqlardaǵı hám ózleriniń blogındaǵı waqıya-hádiyseler tuwralı pikir alısadı. Olar shıdamlılıq, stereotiplerdi buzıw hám haqıyqatlıqtı qabıllawǵa úyretetuǵın tásirli materiallardı tarqatıw arqalı ekstremizmge qarsı ekenin bildiredi.
Tańlawdıń maqseti de videomateriallar hám maqalalar járdeminde jaslardı terrorizmniń qáwpinen eskertiw hám oǵan qarsı shıǵıw bolıp tabıladı. «Oraylıq Aziya jasları terrorizmge qarsı» tańlawın ótkeriwge Ózbekstandaǵı Evropada qáwipsizlik hám birge islesiw shólkemi Sekretariatı, shólkemniń Oraylıq Aziyadaǵı dala missiyaları hám terrorizmge qarsı gúresiw boyınsha informaciyalıq portal járdem beredi. Bul portal házirgi kúnde Ózbekstandaǵı joybarlar Koordinatorı tárepinen jergilikli «Aymaqlıq qáwip-qáterlerdi úyreniw orayı» juwapkershiligi sheklengen jámiyeti menen birge islep shıǵılmaqta.
Tańlaw ushın materiallar usı jıl 1-iyunge shekem qabıllanadı. Onda Qazaqstan, Qırǵızstan, Tájikstan, Túrkmenstan hám Ózbekstan Respublikalarınıń 30 jasqa shekemgi jasları qatnasıwı múmkin.
Qaraqalpaqstan xabar agentligi.