Ózbekistan boyınsha tek 5 student ılayıq kórilgen Muhammed ál-Xorezmiy atındaǵı stipendiyanıń iyesi, bir qansha xalıqaralıq hám jergilikli ilimiy konferenciyalardıń toplamlarında jarıq kórgen 13 ten aslam ilimiy tezislerdiń avtorı, Tashkent informaciyalıq texnologiyalar universiteti Nókis filialınıń Telekommunikaciya texnologiyaları baǵdarı studenti Ulbosın Saparova kishi kúshleniwdi talap etetuǵın qurılmalar ushın quwatlandırıwshı úskene (blok pitaniya) oylap taptı.

Bul úskene elektr togi dáreginen kelip turǵan 220 voltlıq kúshleniwdi 0 volttan 12 voltqa shekemgi ózgermes kúshleniwge aylandırıp beredi. Shet ellerden alıp kelingen ámeliy texnologiyalıq laboratoriyalar kishi kúshleniwdi talap etetuǵın bolsa, usı qurılmadan paydalansa boladı. Ol birgelesip bir funkciyanı atqaratuǵın transformator, ózgeriwsheń rezistor, diod, plata, kondensator, ózgeriwsheń qarsılıq, TT-905 markalı tranzistorlardan quraladı.

Ápiwayılastırıp aytqanda, qurılma qol telefonlarınıń batareyasın quwatlandırıp beriwshi «tasbaqa» dep atalatuǵın úskenege uqsap ketedi, biraq Ulbosın jaratqan qurılmada quwatlanıw dárejesin qol menen belgilep te ala beriwge boladı hám bul úskene menen saat yamasa pult ushın arnalǵan batareyalardı da quwatlandırıw múmkin. Sebebi, bunday kishi batareyalar kishi kúshleniwge (1 yarım – 2 volt kwshleniwge) quwatlanadı. Qurılmanıń jáne bir jetiskenligi ol arqalı berilgen kúshleniw ózgermes, yaǵnıy tok birese kúsheyip, birde azayıp turǵan bolsa da, kúshleniw belgilep alınǵan dárejeden ózgermeydi.

– Kishkentayımnan kóp nárselerdi buzıp, qayta jıynawǵa, ishinde ne bar ekenin biliwge qızıqqanman. Ásirese, shash keptiretuǵın fenniń motorınan paydalanıp, vertolyotke uqsaǵan bir nárselerdi qurastırıp islegenmen, – deydi U.Saparova. – Meniń usınday injenerlikke bolǵan qızıǵıwshılıǵım Tashkent informaciyalıq texnologiyalar universiteti Nókis filialına oqıwǵa jeteledi. Izlenislerdi dawam ettiremen. Oylap qoyǵan rejelerim kóp. Oylap tapqan jańalıqlarım adamlardıń iygiligine jarasa – sol maǵan úlken baxıt.

M.PIRNAZAROVA.

Qaraqalpaqstan xabar agentliginiń xabarshısı