O‘zbekiston yoshlar terma jamoasi Rossiya va Qozog‘istonda boks bo‘yicha o‘tkazilgan xalqaro turnirlarda muvaffaqiyatli qatnashdi.

Rossiyadagi xalqaro turnirda O‘zbekiston, Belarus, Qozog‘iston, Ukrainadan kelgan bokschilar o‘n vazn toifasida o‘zaro bellashdi.

Nufuzli turnirda bokschilarimizdan Ahmadjon Ahmedov, Koblanbay To‘raboyev, Farhod Eshmuhamedov, Ruslan Abdullayev, Asadbek Abduraimov, Farruxbek Hasanov, Login Petrov, Nurislom Isomilov, Jahongir Zokirov, Shohjahon Abdullayev oltin medalni qo‘lga kiritdi. Shuningdek, N.Ismoilov musobaqaning eng yaxshi bokschisi, deya tan olindi. Musobaqda 10 oltin medalga sazovor bo‘lgan O‘zbekiston terma jamoasi umumjamoa hisobida birinchi o‘rinni egalladi.

Qozog‘istonda o‘tgan xalqaro turnirda Qozog‘iston, O‘zbekiston, Rossiya va Qirg‘iziston bokschilari o‘n vazn toifasida g‘oliblik uchun ringga ko‘tarildi.

Jamshid Xudoyberganov, Iqboljon Murodov va Temur Ataboyev musobaqa g‘olibi bo‘ldi. Asadbek Shodiboyev va Navo Tamazov kumush medalga sazovor bo‘ldi, Temurbek Dehqonov bronza medalni qo‘lga kiritdi.

Shu tariqa O‘zbekiston terma jamoasi 3 oltin, 2 kumush va 1 bronza medal bilan umumjamoa hisobida ikkinchi o‘rinni egalladi.