Xalqaro zamonaviy beshkurash ittifoqining (UIPM) Saudiya Arabistoni Ar-Riyod shahrida o‘tkazilgan 73-kongressida O‘zbekiston zamonaviy beshkurash federatsiyasi raisi Bahromjon Gaziyev ishtirok etdi.
73-kongress davomida delegatlar UIPM prezidentligi, vitse-prezidentligi va Ijroiya qo‘mita a’zoligi uchun nomzodlarga ovoz berishdi.
Xalqaro tashkilotga AQSH Zamonaviy beshkurash federatsiyasi prezidenti Robert Stull yangi prezident etib saylandi. Yig‘ilishda, shuningdek UIPM Ijroiya kengashi tarkibi belgilab olindi.
Kongress davomida O‘zbekiston zamonaviy beshkurash federatsiyasi raisi Bahromjon Gaziyev yurtimizda ushbu sport turini yanada rivojlantirish borasida xalqaro tashkilot mutasaddilari, zamonaviy beshkurash bo‘yicha katta tajribaga ega chet ellik mutaxassislar bilan muloqot qildi. Bir qator manfaatli kelishuvlarga erishildi.
Uchrashuvlar chog‘ida Xalqaro zamonaviy beshkurash federatsiyasining yangi saylangan prezidenti Robert Stull O‘zbekistonda ushbu sport turi qisqa fursatda katta yuksalishga erishganini, mamlakatimiz zamonaviy beshkurashchilari o‘tgan Olimpiya o‘yinlarining 2 ta yo‘llanmasiga ega chiqqanini e’tirof etib, hamkorlik aloqalarini yangi bosqichga olib chiqish, dunyoning yetakchi terma jamoalari bilan o‘quv-mashg‘ulot yig‘inlarini tashkil etish kabi bir qator masalalarda ko‘mak berishini bildirib o‘tdi.
T.Ro‘ziyev,
O‘zA