Qo‘qondagi buyum bozorida sodir bo‘lgan yong‘in oqibatida yonib ketgan do‘konlarni davlatimiz rahbarining ko‘rsatmalari bilan bir oy muddatda to‘liq qayta tiklab berish bo‘yicha keng ko‘lamli ishlar davom ettirilmoqda.

Bozorni qayta tiklash va qurilish jarayonlarini muvofiqlashtirish va nazorat qilish uchun hududda viloyat hokimligi tomonidan ishchi shtab tashkil etildi. Farg‘ona viloyatidagi tashkilot va idoralardan yetarli kuch va vositalarni, 2000 nafardan ziyod hasharchini jalb qilgan holda bozor hududida 3 kun davomida yong‘indan keyingi tozalash ishlari amalga oshirildi va yakunlandi.

Qurilish va uy-joy kommunal xizmat ko‘rsatish vaziri Botir Zokirov tomonidan bozorning loyihasi ishlab chiqilib, tasdiqlandi. Viloyat hokimining o‘rinbosari Hojiqo‘zijon Isaqov tomonidan viloyat mutasaddi tashkilotlari hamda quruvchilar ishtirokida ishlarning borishi yuzasidan bozor hududida muhokama yig‘ilishi o‘tkazildi. Bozor hududida qurib bitkazilishi rejalashtirilayotgan 977 savdo do‘koni, jami 37 qurilish-pudrat tashkilotlariga biriktirib berildi.

Yig‘ilishda qurilish ishlarini tez va sifatli amalga oshirish bo‘yicha aniq ko‘rsatmalar berildi, ishlar ustidan doimiy nazorat qilish bo‘yicha mas’ullarga vazifalar belgilandi. Har bir qurilish-pudrat tashkilotiga biriktirilgan qism bo‘yicha kunlik reja-grafik tuzish hamda unga qat’iy amal qilinishini ta’minlash bo‘yicha topshiriq berildi.

Qurilish ishlarini jadallashtirish uchun pudratchi tashkilotlar ishchilariga bozorga tutash hududda yotoqxona tashkil etish, qurilish maydoniga kech soatlarda to‘laqonli ishlash uchun yetarli darajada yoritish tizimi o‘rnatish bo‘yicha mutasaddilarga vazifalar yuklandi.

M.Sulaymonov, O‘zA