Өзбекстан Республикасы Президентиниң қарары

Жаңа Өзбекстанда «Инсан қәдири ушын, инсан бахты ушын» деген ийгиликли идея тийкарында әмелге асырылып атырған кең көлемли реформалардың нәтийжесинде халқымыздың абаданлығын арттырыў, көп миллетли жәмийетимизде тынышлық-татыўлық, дослық ҳәм аўызбиршиликти беккемлеў бағдарындағы жумыслар сапа жағынан жаңа басқышқа көтерилмекте.

Булардың бәри кеңпейиллик, сақыйлық ҳәм шүкиршилик тымсалы болған мүбәрек Рамазан айын елимизде тыныш-татыў, пайызлы ҳәм қуўанышлы орталықта өткериўде үлкен әҳмийетке ийе болмақта. Буны ел-журтымыз арасында адамгершилик, өз-ара ҳүрмет ҳәм мийрим-шәпәәт, кем тәмийинленген ҳәм мүтәж шаңарақларға итибар ҳәм ғамқорлық көрсетиў сыяқлы жоқары адамгершилик пазыйлетлер бүгинги күнлерде буннан былай да айқын көзге тасланып атырғаны да тастыйықлайды.

Уллы әййям – муқаддес Рамазан ҳайытын әне усындай қайырлы ислерди избе-из даўам еттирген ҳалда ҳәр тәреплеме мүнәсип күтип алыў, өткериў ҳәм оның мазмунында жәмленген ийгиликли қәдрият ҳәм дәстүрлерди кеңнен үгит-нәсиятлаў мақсетинде қарар етемен:

1. Усы жылы Рамазан ҳайытының биринши күни 30-март – екшемби күнине туўра келиўи ҳаққындағы Өзбекстан мусулманлары басқармасының мәлимлемеси мағлыўмат ушын қабыл етилип, елимизде 2025-жыл 30-март күни Рамазан ҳайыт байрамы сыпатында кеңнен белгиленсин.
2. Өзбекстан Республикасы Мийнет кодексиниң 208-статьясына муўапық:

а) исленбейтуғын байрам күни есапланатуғын Рамазан ҳайытының биринши күни 2025-жылы екшемби – дем алыс күнине туўра келиўи мүнәсибети менен усы дем алыс күни 31-март – дүйшемби күнине көширилетуғыны;

б) онда өнирислик-техникалық ҳәм шөлкемлестириўшилик шараятлар (әмелдеги үзликсиз өндирис, халыққа ҳәр күни хызмет көрсетиў, нәўбетшилик тийкарында ислеў ҳәм басқалар) себепли исленбейтуғын байрам күнлери тоқтатып қойыў мүмкин болмаған жумысларды атқарыўда дем алыс күнлери көширилмейтуғыны мағлыўмат ушын қабыл етилсин.

3. Қарақалпақстан Республикасы Министрлер Кеңеси, ўәлаятлар ҳәм Ташкент қаласы ҳәкимликлери Дин ислери бойынша комитет, Өзбекстан мәҳәллелери ассоциациясы, Социаллық қорғаў миллий агентлиги ҳәм басқа да бирге ислесиўши шөлкемлер менен биргеликте аймақларда Рамазан ҳайытын халқымыздың миллий дәстүр ҳәм үрп-әдетлерине сәйкес түрде өткериў бойынша тийисли илажларды әмелге асырсын.

Туризм комитети Транспорт минстрлиги менен биргеликте ўатанласларымыз ушын Рамазан ҳайыты күнлеринде муқаддес зыярат орынлары  ҳәм тарийхый орынларға зыяратларды шөлкемлестириў мақсетинде қолайлы шараятлар менен имканиятлар жаратсын.

4. Өзбекстан Миллий телерадиокомпаниясы, Өзбекстан Миллий мәлимлеме агентлиги ҳәм басқа да ғалаба хабар қуралларына Рамазан ҳайытын белгилеў менен байланыслы илажларды кеңнен сәўлелендириў усыныс етилсин.
5. Усы қарардың орынланыўын қадағалаў Өзбекстан Республикасы Бас министри А.Н.Ариповқа ҳәм Өзбекстан Республикасы Президентиниң кеңесгөйи Р.Қ.Давлетовқа жүкленсин.

Өзбекстан Республикасы  Президенти  

   Ш.Мирзиёев

Ташкент қаласы,

2025-жыл 26-март