Тийкарғы реформалар бағдарламалары ҳәм “Өзбекстан – 2030” стратегиясын 2026-жылы әмелге асырыў бойынша Мәмлекетлик бағдарлама тастыйықланды. Реформалар бағдарламалары мәмлекетимиз басшысының халқымыз ҳәм Олий Мажлиске Мүрәжатында алға қойылған басламалар ҳәм 2026-жыл ушын ең тийкарғы реформаларды қамтып алған.

Атап айтқанда, мәҳәллелер инфраструктурасын жетилистириў ҳәм оларға Жаңа Өзбекстан келбетин алып кириў, экономиканы технологиялық ҳәм инновациялық өсиў моделине өткериў және ишки базарда талапты хошаметлеў, кәсиплерди раўажландырыў ҳәм жаңа мийнет базары архитектурасын жаратыў, экологиялық теңсалмақлылықты тәмийинлеў ҳәм суўдан ақылға уғрас пайдаланыўды шөлкемлестириў, мәмлекетлик басқарыў ҳәм суд-ҳуқық системасын жетилистириў және жәмийетте аўызбиршиликти тәмийинлеў арқалы оны жоқарылатыў тийкарғы бағдарлар сыпатында белгилеп берилди.

Бағдарлама менен 337 бәнттен ибарат әмелий илажлар режеси тастыйықланбақта. 2026-жылы тараўлар кесиминде ең әҳмийетли 59 нормативлик-ҳуқықый ҳүжжет жойбары ҳәм ең әҳмийетли стратегиялық реформаларды нәзерде тутатуғын 12 нормативлик-ҳуқықый ҳүжжет жойбары ислеп шығылады.

Жойбарлар кең жәмийетшиликтиң додалаўынан өткерилди. 5 миллионнан аслам пуқара интернет арқалы танысты, 22 мыңнан аслам усыныс билдирилди. Жоқары оқыў орынлары ҳәм мәмлекетлик уйымларда 50 ден аслам додалаў илажлары өткерилип, оларда 10 мыңға шамалас студент, профессор-оқытыўшылар ҳәм мәмлекетлик хызметкерлер қатнасты. Соның менен бирге, сырт елдеги ўатанласлар менен де айрықша сөйлесиўлер шөлкемлестирилип, бир қатар қосымша басламалар билдирилди. 1000 ға шамалас конструктивлик усыныс Мәмлекетлик бағдарлама жойбарына киргизилди.

Реформалар бағдарламалары ҳәм “Мәҳәллени раўажландырыў ҳәм жәмийетти илгерилетиў жылы” Мәмлекетлик бағдарламасында белгиленген мақсет ҳәм ўазыйпалар, барлық илажлар жаңа жумыс орынларын көбейтиў, дәраматларды арттырыў, халықтың абаданлығы ҳәм елдиң абаданлығын тәмийинлеўге хызмет ететуғынын атап өтиў керек.

Муҳтарама Комилова, ӨзА