Ҳүкимет қарары менен усы жылдың 11-ноябрь сәнесинде “Өзбекстан Республикасы Денсаўлықты сақлаў министрлиги системасындағы медицина мәкемелеринде төлемли хызмет көрсетиў тәртиби ҳаққында”ғы реже тастыйықланды.

Режеге бола, медицина мәкемесине жобалы медициналық жәрдем алыў ушын наўқас тийисли жолламасыз, өз ықтыяры менен мүрәжат еткенде, медициналық жәрдем белгиленген тәртипте төлемли тийкарда көрсетиледи.

Мәмлекет тәрепинен бирлемши медициналық-санитариялық жәрдем мәкемелеринде кепилленген пакет шеңберинде бийпул көрсетилетуғын медициналық хызметлерден тысқары хызметлер қосымша есапланады ҳәм төлемли тийкарда көрсетиледи.

Наўқас медицина мәкемелериниң дизимге алыў бөлимлери тәрепинен қабыл етиледи ҳәм дизимге алынады.

Ҳәр бир наўқастың медициналық картасына оның шахсын тастыйықлаўшы мағлыўматлары тийкарында төлемли хызмет көрсетилиўи белгиленеди.

Наўқаслар медицина мәкемесине төлемди алдыннан толық төлеў шәртлери менен қабыл етиледи.

Медициналық мәкемелерге келген шахслар тастыйықланған баҳалар бойынша ҳақы төлегеннен соң мәсләҳәт алыў ушын қәниге шыпакерге ҳәм (ямаса) инструментал-лабораториялық диагноз қойыўға жибериледи.

Тексериў нәтийжелерине бола тар тараў қәнигесиниң тексериўине жибериў ҳәм (ямаса) наўқасқа амбулатор яки стационар шараятта емлениў илажы белгиленеди.

ӨзА