Húkimet qararı menen usı jıldıń 11-noyabr sánesinde “Ózbekstan Respublikası Densawlıqtı saqlaw ministrligi sistemasındaǵı medicina mákemelerinde tólemli xızmet kórsetiw tártibi haqqında”ǵı reje tastıyıqlandı.

Rejege bola, medicina mákemesine jobalı medicinalıq járdem alıw ushın nawqas tiyisli jollamasız, óz ıqtıyarı menen múrájat etkende, medicinalıq járdem belgilengen tártipte tólemli tiykarda kórsetiledi.
Mámleket tárepinen birlemshi medicinalıq-sanitariyalıq járdem mákemelerinde kepillengen paket sheńberinde biypul kórsetiletuǵın medicinalıq xızmetlerden tısqarı xızmetler qosımsha esaplanadı hám tólemli tiykarda kórsetiledi.
Nawqas medicina mákemeleriniń dizimge alıw bólimleri tárepinen qabıl etiledi hám dizimge alınadı.
Hár bir nawqastıń medicinalıq kartasına onıń shaxsın tastıyıqlawshı maǵlıwmatları tiykarında tólemli xızmet kórsetiliwi belgilenedi.
Nawqaslar medicina mákemesine tólemdi aldınnan tolıq tólew shártleri menen qabıl etiledi.
Medicinalıq mákemelerge kelgen shaxslar tastıyıqlanǵan bahalar boyınsha haqı tólegennen soń másláhát alıw ushın qánige shıpakerge hám (yamasa) instrumental-laboratoriyalıq diagnoz qoyıwǵa jiberiledi.
Tekseriw nátiyjelerine bola tar taraw qánigesiniń tekseriwine jiberiw hám (yamasa) nawqasqa ambulator yaki stacionar sharayatta emleniw ilajı belgilenedi.

ÓzA