Өзбекстанда  Facebook, Instagram, WhatsApp, Threads сыяқлы социаллық тармақларға ийелик етиўши Meta компаниясының ўәкилханасы ашылыўы мүмкин. Бул ҳаққында Перспективалы жойбарлар миллий агентлиги (ПЖМА) хабар етти.

Мәлим етилиўинше, ПЖМАда Meta компаниясы ўәкиллери менен ушырасыў болып өткен. Додалаў ўақтында Өзбекстанда Meta ўәкилханасын ашыў перспективалары, рекламаны алға қойыў ҳәм компания платформаларында жайластырыўда алдаўшылықтың алдын алыў бойынша бирге ислесиўди раўажландырыў, сондай-ақ, контентти монетизациялаў ҳәм мәмлекеттеги санлы контент жаратыўшыларды қоллап-қуўатлаў мәселелери додаланды.

Ушырасыўда Meta ўәкиллери арасында Қубла ҳәм Орайлық Азия еллери ушын мәмлекетлик сиясат бойынша директор Сарим Азиз, Орайлық Азия, Монголия, Шри-Ланка ҳәм Мальдив атаўлары ушын мәмлекетлик сиясат бойынша басшы Сенура Абейвардена, Орайлық Азия, Гонконг ҳәм Тайвань бойынша ҳүкимет пенен байланыслар ҳәм социаллық басламалар бойынша басшы Аурора Ли ҳәм Орайлық Азия ҳәм Монголия ушын мәмлекетлик сиясат бойынша регионаллық менеджер Ерасил Калихан болды.

Тәреплер санлы платформаларды тәртипке салыў, пайдаланыўшыларды қорғаў ҳәм әдил монетизция системасын раўажландырыў бойынша тиккелей сөйлесиў орнатыў ҳәм тәжирийбе алмасыў әҳмийетли екенлигин атап өтти. Сондай-ақ, санлы қәўипсизлик, реклама ашық-айдынлығы, жуўапкершиликли санлы минез-қулықты үгит-нәсиятлаў мәселелерине айрықша итибар қаратылған.

Жуўмағында өз-ара бирге ислесиўди даўам еттириў ҳәм бирге ислесиўдиң анық бағдарларын үйрениў бойынша келисимге ерисилди.

Қарақалпақстан хабар агентлиги