Ózbekstanda Facebook, Instagram, WhatsApp, Threads sıyaqlı sociallıq tarmaqlarǵa iyelik etiwshi Meta kompaniyasınıń wákilxanası ashılıwı múmkin. Bul haqqında Perspektivalı joybarlar milliy agentligi (PJMA) xabar etti.

Málim etiliwinshe, PJMAda Meta kompaniyası wákilleri menen ushırasıw bolıp ótken. Dodalaw waqtında Ózbekstanda Meta wákilxanasın ashıw perspektivaları, reklamanı alǵa qoyıw hám kompaniya platformalarında jaylastırıwda aldawshılıqtıń aldın alıw boyınsha birge islesiwdi rawajlandırıw, sonday-aq, kontentti monetizaciyalaw hám mámlekettegi sanlı kontent jaratıwshılardı qollap-quwatlaw máseleleri dodalandı.
Ushırasıwda Meta wákilleri arasında Qubla hám Oraylıq Aziya elleri ushın mámleketlik siyasat boyınsha direktor Sarim Aziz, Oraylıq Aziya, Mongoliya, Shri-Lanka hám Maldiv atawları ushın mámleketlik siyasat boyınsha basshı Senura Abeyvardena, Oraylıq Aziya, Gonkong hám Tayvan boyınsha húkimet penen baylanıslar hám sociallıq baslamalar boyınsha basshı Aurora Li hám Oraylıq Aziya hám Mongoliya ushın mámleketlik siyasat boyınsha regionallıq menedjer Erasil Kalixan boldı.
Tárepler sanlı platformalardı tártipke salıw, paydalanıwshılardı qorǵaw hám ádil monetizciya sistemasın rawajlandırıw boyınsha tikkeley sóylesiw ornatıw hám tájiriybe almasıw áhmiyetli ekenligin atap ótti. Sonday-aq, sanlı qáwipsizlik, reklama ashıq-aydınlıǵı, juwapkershilikli sanlı minez-qulıqtı úgit-násiyatlaw máselelerine ayrıqsha itibar qaratılǵan.
Juwmaǵında óz-ara birge islesiwdi dawam ettiriw hám birge islesiwdiń anıq baǵdarların úyreniw boyınsha kelisimge erisildi.

Qaraqalpaqstan xabar agentligi