Президент Шавкат Мирзиёев Түркий мәмлекетлер шөлкеминиң Габала саммитинде түркий дүньяның тилеклеслигин беккемлеў, жәҳән сиясаты, экономикасы ҳәм гуманитарлық тараўдағы ролин арттырыўға қаратылған бир қатар әҳмийетли басламаларды алға қойды.

Соннан:

– регионаллық ҳәм глобал қәўипсизлик мәселелери бойынша көзқарасларды муўапықластырыў мақсетинде Самарқандта ТМШ сыртқы ислер министрлери ҳәм арнаўлы хызметлери басшыларының биринши биргеликтеги ушырасыўын өткериўди усыныс етти;

– Стратегиялық шериклик, мәңги дослық ҳәм туўысқанлық ҳаққындағы шәртнаманы тез пурсатта қабыл етиўди қоллап-қуўатлады ҳәм Түркий мәмлекетлер шөлкемин 2030-жылға шекем раўажландырыў стратегиясын ислеп шығыў басламасы менен шықты;

– Түркий мәмлекетлердиң экономикалық шериклик бойынша Турақлы кеңесин дүзиў ҳәм оның Жойбарлаў офисин Ташкентте жайластырыўды усыныс етти;

– Жаңа экономикалық имканиятлар мәканын қәлиплестирип, Түркий мәмлекетлердиң Санаат альянсы, “Түркий жасыл коридорлар” системасы ҳәм “Жасыл трансформация” консорциумын шөлкемлестириў басламасын алға қойды;

– Органикалық аўыл хожалығы бойынша Экспертлер топарын шөлкемлестириў ҳәм түркий органикалық өнимлердиң бирден-бир брендин дүнья базарына алып шығыўды усыныс етти;

– Орта коридорды раўажландырыў ҳәм оны Қытай – Қырғызстан – Өзбекстан темир жолы және Трансаўған коридоры жойбарлары менен байланыстырыўды қоллап-қуўатлады, бажыхана тәртип-қағыйдаларын санластырыў ҳәм тарифлерди оптималластырыўдың әҳмийетли екенлигин атап өтти;

– Түркий инвестиция қорының жумысын кеңейтиў ҳәм халықаралық ҳәм миллий финанс институтлары менен бирге ислесиў бағдарламасын қабыл етиўди усыныс етти;

– Жасалма интеллект ҳәм креатив экономика бойынша “жол картасы”н қабыл етиў ҳәм Түркий дүнья халықаралық көргизбесин Өзбекстанда өткериў идеясын алға қойды;

– Өзбекстанда биргеликтеги изертлеўлер ҳәм инновациялар майданына айланатуғын Түркий мәмлекетлер халықаралық университетиниң шөлкемлестирилетуғынын жәриялады;

– Экстремистлик ҳәм радикал идеологияға қарсы гүресиў бойынша ҳәрекетлер режеси ҳәм жаслардың экологиялық саўатлылығын арттырыў бойынша биргеликтеги илажлар ислеп шығыўды усыныс етти;

– 2026-жылы “Низамий Генжеўий ҳәм Әлийшер Наўайы дөретиўшилиги – Түркий дүнья руўхый турмысында” атамасында халықаралық конференция өткериў басламасын алға қойды.

ӨзА