Prezident Shavkat Mirziyoev Túrkiy mámleketler shólkeminiń Gabala sammitinde túrkiy dúnyanıń tileklesligin bekkemlew, jáhán siyasatı, ekonomikası hám gumanitarlıq tarawdaǵı rolin arttırıwǵa qaratılǵan bir qatar áhmiyetli baslamalardı alǵa qoydı.

Sonnan:
– regionallıq hám global qáwipsizlik máseleleri boyınsha kózqaraslardı muwapıqlastırıw maqsetinde Samarqandta TMSh sırtqı isler ministrleri hám arnawlı xızmetleri basshılarınıń birinshi birgeliktegi ushırasıwın ótkeriwdi usınıs etti;
– Strategiyalıq sheriklik, máńgi doslıq hám tuwısqanlıq haqqındaǵı shártnamanı tez pursatta qabıl etiwdi qollap-quwatladı hám Túrkiy mámleketler shólkemin 2030-jılǵa shekem rawajlandırıw strategiyasın islep shıǵıw baslaması menen shıqtı;
– Túrkiy mámleketlerdiń ekonomikalıq sheriklik boyınsha Turaqlı keńesin dúziw hám onıń Joybarlaw ofisin Tashkentte jaylastırıwdı usınıs etti;
– Jańa ekonomikalıq imkaniyatlar mákanın qáliplestirip, Túrkiy mámleketlerdiń Sanaat alyansı, “Túrkiy jasıl koridorlar” sisteması hám “Jasıl transformaciya” konsorciumın shólkemlestiriw baslamasın alǵa qoydı;
– Organikalıq awıl xojalıǵı boyınsha Ekspertler toparın shólkemlestiriw hám túrkiy organikalıq ónimlerdiń birden-bir brendin dúnya bazarına alıp shıǵıwdı usınıs etti;
– Orta koridordı rawajlandırıw hám onı Qıtay – Qırǵızstan – Ózbekstan temir jolı jáne Transawǵan koridorı joybarları menen baylanıstırıwdı qollap-quwatladı, bajıxana tártip-qaǵıydaların sanlastırıw hám tariflerdi optimallastırıwdıń áhmiyetli ekenligin atap ótti;
– Túrkiy investiciya qorınıń jumısın keńeytiw hám xalıqaralıq hám milliy finans institutları menen birge islesiw baǵdarlamasın qabıl etiwdi usınıs etti;
– Jasalma intellekt hám kreativ ekonomika boyınsha “jol kartası”n qabıl etiw hám Túrkiy dúnya xalıqaralıq kórgizbesin Ózbekstanda ótkeriw ideyasın alǵa qoydı;
– Ózbekstanda birgeliktegi izertlewler hám innovaciyalar maydanına aylanatuǵın Túrkiy mámleketler xalıqaralıq universitetiniń shólkemlestiriletuǵının járiyaladı;
– Ekstremistlik hám radikal ideologiyaǵa qarsı gúresiw boyınsha háreketler rejesi hám jaslardıń ekologiyalıq sawatlılıǵın arttırıw boyınsha birgeliktegi ilajlar islep shıǵıwdı usınıs etti;
– 2026-jılı “Nizamiy Genjewiy hám Áliysher Nawayı dóretiwshiligi – Túrkiy dúnya ruwxıy turmısında” atamasında xalıqaralıq konferenciya ótkeriw baslamasın alǵa qoydı.

ÓzA