Усы жылдың 12-сентябрь күни мәмлекетимиз басшысы тәрепинен “Аўыл хожалығына мөлшерленген жерлерде өним жетистириўдиң үзликсизлигин тәмийинлеў ҳәм жерден пайдаланыў нәтийжелилигин арттырыў бойынша қосымша илажлар ҳаққында”ғы пәрманға қол қойылды.

Мәмлекетлик кадастрлар палатасы Ташкент қалалық басқармасы сектор баслығы Анвар Умиров бул бойынша төмендегилерди мәлим етти.

– Бул пәрманның қабыл етилиўи бул реформалардың тиккелей логикалық даўамы сыпатында толықтыратуғын механизм болды, десек асыра айтқан болмаймыз. Себеби өткен дәўирлердеги реформаларда биринши гезекте жер участкаларын ижараға бериў системасы ҳәм механизмлери жетилистирилди. Булар дәслеп ашық электрон таңлаўлар, кейин аукцион тәртибине өткерилди ҳәм толық базар механизмине айланып барды.

Пәрманның тийкарғы мақсети аўыл хожалығы жерлеринен ақылға уғрас, нәтийжели ҳәм үзликсиз пайдаланыўды жолға қойыў, бос турған жерлерди оператив есапқа алыў ҳәм оларды онлайн аукционлар арқалы реализациялаў, сондай-ақ, қайта ижараға бериў тәртибин әпиўайыластырыўдан ибарат.

Ҳүжжетке муўапық, барлық район ҳәм қала ҳәкимликлери аймағындағы бос жерлер 10 күн мүддетте мәмлекетлик жер кадастрында дизимге алынады ҳәм және 10 күн ишинде электрон аукцион саўдаларына шығарылады. Аукционлардан түскен қаржылар болса аймақлық инфраструктураны раўажландырыў, соның ишинде, суўды үнемлейтуғын технологияларды енгизиў, суўғарыў системаларын модернизациялаў ҳәм жаңа жерлерди өзлестириўге қаратылады.

Сондай-ақ, пәрман менен, аўыл хожалығы жерлерин бөлеклерге бөлип қайта ижараға бериў ҳуқықы енгизилди. Енди ижара ҳуқықы тийкарында ажыратылған жерлердиң бир бөлегин басқа шахсқа ижараға бериў мүмкин болады. Соның менен бирге, аўыл хожалығы жерлерине тек ғана ижара ҳуқықы тән алынатуғыны қатаң белгиленди.

Бул жерлердиң ийелери ҳәм пайдаланыўшыларына жер участкаларына болған ийелик етиў ҳәм пайдаланыў ҳуқықларын халық депутатлары районлық (қалалық) Кеңеслериниң қарары тийкарында ижара ҳуқықын өзгертиў имканияты бериледи.

Ижара мүддети Өзбекстан пуқаралары ҳәм олар шөлкемлестирген кәрханалар ушын 30 жыл, шет ел инвестициясы қатнасыўындағы кәрханалар ушын болса 25 жыл етип белгиленди.

Гулноза Бобоева, ӨзА