Usı jıldıń 12-sentyabr kúni mámleketimiz basshısı tárepinen “Awıl xojalıǵına mólsherlengen jerlerde ónim jetistiriwdiń úzliksizligin támiyinlew hám jerden paydalanıw nátiyjeliligin arttırıw boyınsha qosımsha ilajlar haqqında”ǵı pármanǵa qol qoyıldı.

Mámleketlik kadastrlar palatası Tashkent qalalıq basqarması sektor baslıǵı Anvar Umirov bul boyınsha tómendegilerdi málim etti.
– Bul pármannıń qabıl etiliwi bul reformalardıń tikkeley logikalıq dawamı sıpatında tolıqtıratuǵın mexanizm boldı, desek asıra aytqan bolmaymız. Sebebi ótken dáwirlerdegi reformalarda birinshi gezekte jer uchastkaların ijaraǵa beriw sisteması hám mexanizmleri jetilistirildi. Bular dáslep ashıq elektron tańlawlar, keyin aukcion tártibine ótkerildi hám tolıq bazar mexanizmine aylanıp bardı.
Pármannıń tiykarǵı maqseti awıl xojalıǵı jerlerinen aqılǵa uǵras, nátiyjeli hám úzliksiz paydalanıwdı jolǵa qoyıw, bos turǵan jerlerdi operativ esapqa alıw hám olardı onlayn aukcionlar arqalı realizaciyalaw, sonday-aq, qayta ijaraǵa beriw tártibin ápiwayılastırıwdan ibarat.
Hújjetke muwapıq, barlıq rayon hám qala hákimlikleri aymaǵındaǵı bos jerler 10 kún múddette mámleketlik jer kadastrında dizimge alınadı hám jáne 10 kún ishinde elektron aukcion sawdalarına shıǵarıladı. Aukcionlardan túsken qarjılar bolsa aymaqlıq infrastrukturanı rawajlandırıw, sonıń ishinde, suwdı únemleytuǵın texnologiyalardı engiziw, suwǵarıw sistemaların modernizaciyalaw hám jańa jerlerdi ózlestiriwge qaratıladı.
Sonday-aq, párman menen, awıl xojalıǵı jerlerin bóleklerge bólip qayta ijaraǵa beriw huqıqı engizildi. Endi ijara huqıqı tiykarında ajıratılǵan jerlerdiń bir bólegin basqa shaxsqa ijaraǵa beriw múmkin boladı. Sonıń menen birge, awıl xojalıǵı jerlerine tek ǵana ijara huqıqı tán alınatuǵını qatań belgilendi.
Bul jerlerdiń iyeleri hám paydalanıwshılarına jer uchastkalarına bolǵan iyelik etiw hám paydalanıw huqıqların xalıq deputatları rayonlıq (qalalıq) Keńesleriniń qararı tiykarında ijara huqıqın ózgertiw imkaniyatı beriledi.
Ijara múddeti Ózbekstan puqaraları hám olar shólkemlestirgen kárxanalar ushın 30 jıl, shet el investiciyası qatnasıwındaǵı kárxanalar ushın bolsa 25 jıl etip belgilendi.

Gulnoza Boboeva, ÓzA