Өзбекстанға келген Әзербайжанның жетекши жоқары билимлендириў мәкемелериниң басшылары Өзбекстандағы Ҳайдар Алиев атындағы Әзербайжан мәденият орайына барды.

Билимлендириў министриниң орынбасары Идрис Исаев басшылығындағы делегацияға дәслеп комплекс жумысы ҳаққында толық мағлыўмат берилди. Орайдың директоры  Акиф Марифли бул  мәденият орайы 2010-жылы Президент Илҳам Алиевтиң қатнасыўында  ашылғанын қанаатланыўшылық пенен еске алды.

– Орай уллы жолбасшының мийрасын үгит-нәсиятлаў, Әзербайжан мәдениятын үйрениў, сондай-ақ, еки мәмлекет арасында мәдений, илимий ҳәм ағартыўшылық  қатнасықларды раўажландырыў мақсетинде жумыс ислейди, – дейди Акиф Марифли. – Буннан тысқары тарийх, мәденият, әдебият пенен байланыслы  көплеген жойбарларды әмелге асырады, концерт бағдарламалары, халықаралық әнжуман, симпозиум, шеберлик сабағы ҳәм көргизбелер  шөлкемлестиреди. Комплексте Ҳайдар Алиев, Мәмлекет тарийхы, Дослық, Әзербайжан гилемлери музейлери, китапхана, аяқ ойыны, сүўрет, тил курслары, жаслардан ибарат театр труппасы жумыс ислейди.

Муҳарамма  Пирматова, ӨзА