Шоманай районы Айрықша жағдайлар бөлиминде ғалаба хабар қураллары хызметкерлери ҳәм блогерлердиң қатнасыўында “Гүзги-қысқы мәўсимде жүз бериўи мүмкин болған айрықша жағдайлардың қәўипин азайтыў бойынша алып барылып атырған илажлар” атамасында баспасөз конференциясы болып өтти.
Конференцияда район халқын гүзги-қысқы мәўсимде жүз бериўи мүмкин болған айрықша жағдайлардан қорғаў бойынша әмелге асырылып атырған жумыслар, қәўипсизлик илажларын күшейтиў ҳәм халық арасында профилактикалық жумысларды алып барыў мәселелери додаланды.
Баспасөз конференцияда бөлим баслығы ҳәм қәнигелери тараў бойынша әмелге асырылып атырған жумыслар туўралы толық мағлыўмат берди.
Атап өтилгениндей, быйылғы жылдың 11 айы даўамында мәмлекет есабындағы объектлерде өрт қәўипсизлиги қағыйдаларына бойынша өткерилген үйрениў жумыслары барысында анықланған кемшиликлерге муўапық тийисли шаралар көрилген.
Райондағы өртлердиң келип шығыў себеплерин алып қарасақ, электр тогиниң қысқа тутасыўы себепли 3, ысытыў печьлериниң насазлығынан 1, отқа итибарсызлық пенен қарағанлықтан 1, жас балалардың от пенен ойнаўынан 2, басқа себеплер менен 4 өрт жүз берген. Өткерилип атырған үгит-нәсиятлаў илажларында пуқаралардан көбинесе усы нәрселерге үлкен итибар қаратыў зәрүр екенлиги, айрықша атап өтилмекте.
Жүз бериўи мүмкин болған айрықша жағдайлардың алдын алыў, өрт қәўипсизлигин тәмийинлеў, пуқаралардың зәҳәрли ийис газинен зәҳәрлениўиниң алдын алыў бойынша мәкеме ҳәм кәрханаларда 124 мәрте, пуқаралар жыйынларында 69 мәрте ушырасыўлар өткерилген. Билимлендириў мәкемелеринде 16 оқыў-сабағы өткерилип, өрт қәўипсизлиги қағыйдалары сәўлеленген роликлер қойып берилип, буклетлер тарқатылған. Турақ жайлардағы ысытыў қурылмаларын сыртқа шығарыў, морыларын тазалаў бойынша жумыслар алып барылмақта.
Конференция қатнасыўшылар өзлерин қызықтырған сораўларға жуўап алды.
Қарақалпақстан хабар агентлиги