Shomanay rayonı Ayrıqsha jaǵdaylar bóliminde ǵalaba xabar quralları xızmetkerleri hám blogerlerdiń qatnasıwında “Gúzgi-qısqı máwsimde júz beriwi múmkin bolǵan ayrıqsha jaǵdaylardıń qáwipin azaytıw boyınsha alıp barılıp atırǵan ilajlar” atamasında baspasóz konferenciyası bolıp ótti.
Konferenciyada rayon xalqın gúzgi-qısqı máwsimde júz beriwi múmkin bolǵan ayrıqsha jaǵdaylardan qorǵaw boyınsha ámelge asırılıp atırǵan jumıslar, qáwipsizlik ilajların kúsheytiw hám xalıq arasında profilaktikalıq jumıslardı alıp barıw máseleleri dodalandı.
Baspasóz konferenciyada bólim baslıǵı hám qánigeleri taraw boyınsha ámelge asırılıp atırǵan jumıslar tuwralı tolıq maǵlıwmat berdi.
Atap ótilgenindey, bıyılǵı jıldıń 11 ayı dawamında mámleket esabındaǵı obyektlerde órt qáwipsizligi qaǵıydalarına boyınsha ótkerilgen úyreniw jumısları barısında anıqlanǵan kemshiliklerge muwapıq tiyisli sharalar kórilgen.
Rayondaǵı órtlerdiń kelip shıǵıw sebeplerin alıp qarasaq, elektr toginiń qısqa tutasıwı sebepli 3, ısıtıw pechleriniń nasazlıǵınan 1, otqa itibarsızlıq penen qaraǵanlıqtan 1, jas balalardıń ot penen oynawınan 2, basqa sebepler menen 4 órt júz bergen. Ótkerilip atırǵan úgit-násiyatlaw ilajlarında puqaralardan kóbinese usı nárselerge úlken itibar qaratıw zárúr ekenligi, ayrıqsha atap ótilmekte.
Júz beriwi múmkin bolǵan ayrıqsha jaǵdaylardıń aldın alıw, órt qáwipsizligin támiyinlew, puqaralardıń záhárli iyis gazinen záhárleniwiniń aldın alıw boyınsha mákeme hám kárxanalarda 124 márte, puqaralar jıyınlarında 69 márte ushırasıwlar ótkerilgen. Bilimlendiriw mákemelerinde 16 oqıw-sabaǵı ótkerilip, órt qáwipsizligi qaǵıydaları sáwlelengen rolikler qoyıp berilip, bukletler tarqatılǵan. Turaq jaylardaǵı ısıtıw qurılmaların sırtqa shıǵarıw, morıların tazalaw boyınsha jumıslar alıp barılmaqta.
Konferenciya qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi