Нөкис қаласында спорттың волейбол түринен ерлер ҳәм ҳаял-қызлар командалары арасында Қарақалпақстан кубоги жарысы болып өтти.
Жарысқа республикамыздың барлық аймақларынан ең күшли командалар қатнасып, кубок жеңимпазлығы ушын өз-ара кескин гүрес алып барды.
Оғада қызықлы өткен ойынлар жуўмағында, ҳаял-қызлар командалары арасында барлық қарсыласларын жеңип шығыўға миясар болған Қараөзек районы командасы кубок ийесине айланды.
Жарыста финалға шекем жетип келген Бердақ атындағы Қарақалпақ мәмлекетлик университети командасы екинши, Өзбекстан мәмлекетлик денетәрбия ҳәм спорт университети Нөкис филиалы командасы үшинши орынды ийелеўге миясар болды.
Ал, ерлер арасында өткерилген жарыс жуўмағында болса, Қарақалпақстан кубогин Өзбекстан мәмлекетлик денетәрбия ҳәм спорт университети Нөкис филиалы командасы қолға киргизиўге еристи.
Өзиниң айрықша шеберликлери менен көзге түскен Қарақалпақстан Республикасы ишки ислер министрлиги командасы екинши, Бердақ атындағы Қарақалпақ мәмлекетлик университети студентлери үшинши орынларды ийелеўге миясар болды.
Жарыс соңында жеңимпаз командалар шөлкемлестириўшилер тәрепинен таярланған арнаўлы кубок, диплом, медаль ҳәм естелик саўғалар менен сыйлықланды.
Адилбай Оразов,
Қарақалпақстан хабар агентлиги шолыўшысы