Nókis qalasında sporttıń voleybol túrinen erler hám hayal-qızlar komandaları arasında Qaraqalpaqstan kubogi jarısı bolıp ótti.
Jarısqa respublikamızdıń barlıq aymaqlarınan eń kúshli komandalar qatnasıp, kubok jeńimpazlıǵı ushın óz-ara keskin gúres alıp bardı.
Oǵada qızıqlı ótken oyınlar juwmaǵında, hayal-qızlar komandaları arasında barlıq qarsılasların jeńip shıǵıwǵa miyasar bolǵan Qaraózek rayonı komandası kubok iyesine aylandı.
Jarısta finalǵa shekem jetip kelgen Berdaq atındaǵı Qaraqalpaq mámleketlik universiteti komandası ekinshi, Ózbekstan mámleketlik denetárbiya hám sport universiteti Nókis filialı komandası úshinshi orındı iyelewge miyasar boldı.
Al, erler arasında ótkerilgen jarıs juwmaǵında bolsa, Qaraqalpaqstan kubogin Ózbekstan mámleketlik denetárbiya hám sport universiteti Nókis filialı komandası qolǵa kirgiziwge eristi.
Óziniń ayrıqsha sheberlikleri menen kózge túsken Qaraqalpaqstan Respublikası ishki isler ministrligi komandası ekinshi, Berdaq atındaǵı Qaraqalpaq mámleketlik universiteti studentleri úshinshi orınlardı iyelewge miyasar boldı.
Jarıs sońında jeńimpaz komandalar shólkemlestiriwshiler tárepinen tayarlanǵan arnawlı kubok, diplom, medal hám estelik sawǵalar menen sıylıqlandı.
Adilbay Orazov,
Qaraqalpaqstan xabar agentligi sholıwshısı