Қәнигелестирилген билимлендириў мәкемелери агентлиги системасындағы Нөкис қаласы 1-санлы қәнигелестирилген мектеп-интернаттың питкериўшиси Шахсәнем Абдуллаева «Эл-юрт Умиди» фонды тәрепинен өткерилген имтиханнан табыслы өтип, дүньядағы ең жақсы ТОП 300 ликке киретуғын АҚШтың The University of Arizona университетине оқыўға кириўге миясар болды.
-Өзим сырт еллерде оқып, билим алғанды қәлейтуғын едим,-дейди Шахсәнем.-Сонлықтан мектепте оқып жүрип, инглис тилинен муғаллимимиз Гүлназ Тилеўмуратоваға таярландым ҳәм усы жылы IELTS сертификатын алыўға миясар болдым. Соңынан «Эл-юрт Умиди» фондына ҳүжжет тапсырып, 14-август күни сын пикирлеў бойынша, 19-августта руўхыйлық бойынша сәўбетлесиў имтиханын тапсырдым. Күни кеше ғана бул имтиханнан өткенлигим бойынша хабар еситтим. Енди несип етсе, АҚШтың ең бир абырайлы жоқары оқыў орынларының биринде оқыйман деп отырман. Ал, ҳәзир болса, Ташкент қаласындағы Өзбекстан мәмлекетлик жәҳән тиллери университетиниң шығыс тиллери факультетинде корейс тили қәнигелигинде билим алып атырман.
-Мектебимизди 2023-2024-оқыў жылында 41 оқыўшы питкерип, соннан 95 процент питкериўши жоқары оқыў орынларына оқыўға кириўге еристи,-дейди Нөкис қаласы 1-санлы қәнигелестирилген мектеп-интернаттың директоры Марат Ибрайымов.-Усы питкериўшилеримиз арасынан Шахсәнем Абдуллаеваның «Эл-юрт Умиди» фонды имтиханларынан табыслы өтип, АҚШтағы ең бир ири оқыў орынларының бирине оқыўға киргенине оғада қуўанышлыман. Енди бул қызымыз АҚШта биотехнология қәнигелиги бойынша билим алады ҳәм ол жақтан елимизге жетик қәниге болып келеди деп ойлайман. Быйылғы питкериўшилеримиз арасынан да усындай билимли жаслар көплеп шығатуғынлығына беккем исенемен.
Ҳақыйқатында да, бүгинги күни 456 оқыўшы билим алып атырған бул оқыў орнында, оқыўшылардың заман талабына сай тәлим-тәрбия алыўы ушын барлық қолайлы шараятлар жаратып берилген. Атап айтқанда, оқыўшылар 5 мезгил аўқат, узақ районлардан келип оқыйтуғын оқыўшылар болса, жатақхана менен тәмийинленген. Оларға өз кәсибиниң маманлары болған 52 муғаллим тәлим-тәрбия бермекте.
Адилбай Оразов,
Қарақалпақстан хабар агентлиги шолыўшысы.