Жасалма интеллект тараўында халықаралық бирге ислесиў, заманагөй технологиялық раўажланыўдың ең әҳмийетли тәреплеринен бири есапланады. Глобал көлемде билим ҳәм ресурсларды бирлестириў, түрли мәмлекетлер ҳәм шөлкемлер арасында инновацияларды тезлестириў имканиятын береди.
Санлы технологиялар министри Шерзод Шерматов АҚШқа хызмет сапары шеңберинде NVIDIA компаниясының жасалма интеллектти үгит-нәсиятлаў бойынша глобал директоры Шилпа Колхаткар менен ушырасты.
Ушырасыўда министр Өзбекстанның санлы трансформация стратегиясын әмелге асырыўда жасалма интеллект технологияларының әҳмийетин атап өтип, Саудия Арабстанның Akwa Power системасындағы Data Volt компаниясы менен жасыл Data орай қурыў бойынша әмелге асырылып атырған ҳәрекетлер ҳәм жасалма интеллект стратегиясы менен таныстырып өтти.
Тәреплер елимиздеги СИ инфраструктурасын раўажландырыўда компания менен бирге ислесиў имканиятлары, NVIDIA тәрепинен Өзбекстанда жоқары нәтийжелиликке ийе есаплаў технологияларын енгизиў, денсаўлықты сақлаў, жәмийетлик хызметлер ҳәм ақыллы қалалар сыяқлы тараўларда инновациялық жойбарларды әмелге асырыў перспективаларын додалады, делинеди Өзбекстан Республикасы Санлы технологиялар министрлигиниң мағлыўматында.
Мағлыўмат орнында айтыў керек, NVIDIA 1993-жылы шөлкемлестирилген болып технология тараўында жетекши компаниялардан бири есапланады. Компания тийкарынан график процессорлар (GPU) ҳәм жасалма интеллект шешимлери менен танылған.
Ушырасыў соңында жасалма интеллект изертлеў ҳәм инновациялық орайларын шөлкемлестириў және мәмлекетлик хызметкерлер ҳәм жасларды бул тараўға оқытыў бойынша бағдарламаларды әмелге асырыў имканиятларына итибар қаратылды.
М.Ҳожиакбарова, ӨзА