Қытай Халық Республикасы Пүткилқытай халық ўәкиллери кеӊесиниӊ турақлы комитети Баслығы Чжао Лэцзи басшылығындағы делегация елимизде әмелий сапар менен болып турыпты.
Қытай делегациясы ағзалары әййемги Самарқандта болып, ески архитектура ҳәм көп әсирлик қаланыӊ тарийхый имаратлары, архитектуралық көринислери менен жақыннан танысты.
Мийманлар сапардыӊ тийкарғы илажлары болып өтетуғын Ташкент қаласына жетип келди. Оларды Ташкент халықаралық аэропортында Олий Мажлис Сенаты Баслығы Танзила Норбоева күтип алды.
***
Әмелий сапар менен мәмлекетимизде болып тураған Пүткилқытай халық ўәкиллери мәжилисиниӊ турақлы комитети Баслығы Чжао Лэцзи басшылығындағы делегация Сенат Баслығы Танзила Норбоева менен бирге Ташкент мәмлекетлик шығыстаныў университети жанындағы Конфуций атындағы Өзбекстан – Қытай институтына барды.
Мийманлар бул билимлендириў орайыныӊ 20 жыллығы мүнәсибети менен шөлкемлестирилген “Конфуций институтлары ҳәм цивилизациялараралық өз-ара билимлендириў” темасындағы халықаралық әнжуманныӊ ашылыў мәресиминде қатнасты.
Илажда Орайлық Азия мәмлекетлериниӊ түрли мәмлекетлик ҳәм билимлендириў мәкемелери ўәкиллери, сондай-ақ, қытайтаныўшылық ҳәм халықаралық қатнасықлар тараўындағы эксперт ҳәм илимпазлар да қатнасты.
Сенат Баслығы шығып сөйлеген сөзинде билимлендириў ҳәм илим, мәдений-гуманитарлық тараўларда еки тәреплеме қатнасықларды раўажландырыўдағы ҳәр бир қәдем халықларымыз арасындағы дослықты беккемлеўде үлкен әҳмийетке ийе екенин атап өтти.
Чжао Лэцзи Ташкенттеги Конфуций институты дүньядағы биринши шөлкемлестирилген институтлардан бири екенин атап өтип, Қытай ҳәм Өзбекстан арасындағы өз-ара бирге ислесиў исенимли ҳәм жыллар сынағынан өткен дослық қатнасықларға тийкарланғанына айрықша итибар қаратты..
Илаж шеӊберинде ҚХР делегациясы Конфуций институтыныӊ соӊғы 20 жыл даўамында ерискен жетискенликлерине бағышланған көргизбе менен танысты.
***
Қытай делегациясы ағзалары Олий Мажлис Сенаты Баслығы менен бирге “Жаӊа Өзбекстан” паркине барып, Мустақиллик монументине гүл қойды.
Делегация басшысы Президент Шавкат Мирзиёевтиӊ басламасы менен қурылған комплекстиӊ архитектуралық шешимлери ҳәм композициясыныӊ өзине тән тәреплери менен танысты.
Пүткилқытай халық ўәкиллери кеӊеси Турақлы комитети делегациясы 2025-жылы болып өтетуғын Азия ҳәм Параазия жас өспиримлер ойынлары қатнасыўшыларын қабыл ететуғын, пайтахтымызда қурылып атырған Олимпиада қалашасында болды.
Чжао Лэцзи дүньяныӊ 70 мәмлекетинде спорт имаратларын қурыў тәжирийбесине ийе Қытайдыӊ “CAMC Engineering” компаниясы менен биргеликте әмелге асырылып атырған Олимпиада қалашасы қурылысыныӊ барысы менен танысты.
Пүткилқытай халық ўәкиллери кеӊеси Турақлы комитетиниӊ баслығы қалашада әмелге асырылып атырған жумыслар көлеми ҳәм сапасын жоқары баҳалап, бул мәмлекет тәрепинен спортты раўажландырыўға қаратылып атырған үлкен итибардан дәрек беретуғынын ҳәм бул жойбарлардыӊ бәршеси Өзбекстан ҳәм Қытай арасында жолға қойылған ҳәр тәреплеме ҳәм көп қырлы бирге ислесиўдиӊ нәтийжеси екенин атап өтти.
Н.Абдураимова, ӨзА